ഡി വൈ പാട്ടീൽ സ്റ്റേഡിയത്തിൽ നടന്ന ഡബ്ല്യുപിഎൽ 2026 മത്സരത്തിൽ മുംബൈ ഇന്ത്യൻസിന് നിർണായകമായ രക്ഷകയായി മാറിയത് വയനാട്ടുകാരിയായ സജന സജീവനാണ്. ക്യാപ്റ്റൻ ഹർമൻപ്രീത് കൗർ പുറത്തായതോടെ മുംബൈ ഇന്ത്യൻസ് വലിയ പ്രതിസന്ധിയിലായിരുന്നു. 11 ഓവറുകൾ പിന്നിടുമ്പോൾ സ്കോർ 67–4 എന്ന നിലയിൽ, റൺറേറ്റ് ആറിന് മുകളിലേക്ക് പോലും ഉയർന്നിരുന്നില്ല.

ആ ഘട്ടത്തിലാണ് നാലാം നമ്പർ ജഴ്സിയണിഞ്ഞ് സജന ക്രീസിലെത്തിയത്. തുടക്കത്തിൽ രണ്ട് തവണ പുറത്താകാനുള്ള സാധ്യതകൾ ഉണ്ടായെങ്കിലും,

ആ അവസരങ്ങൾ മുഴുവൻ പ്രയോജനപ്പെടുത്തി താരം പിന്നീട് എതിരാളി ബൗളർമാരെ സമ്മർദ്ദത്തിലാക്കി. 15-ാം ഓവറിൽ രാധാ യാദവിന്റെ പന്തിനെ ക്രീസുവിട്ടിറങ്ങി ലോങ് ഓണിന് മുകളിലൂടെ 65 മീറ്റർ ദൂരം പറത്തിയ സിക്സ് മുംബൈ ഇന്നിങ്സിന്റെ വഴിത്തിരിവായി.

അതേ ഓവറിലെ അവസാന പന്ത് സ്വീപ്പ് ചെയ്ത് മിഡ് വിക്കറ്റിലേക്ക് ബൗണ്ടറി കണ്ടെത്തിയ സജന, തുടർന്ന് അരുന്ധതി റെഡ്ഡിക്കെതിരെയും ആക്രമണം തുടർന്നു. സ്ലോ ബമ്പറിനെ വിക്കറ്റ് കീപ്പറുടെ തലയ്ക്ക് മുകളിലൂടെ സ്കൂപ്പ് ചെയ്തതടക്കം തുടർച്ചയായ ബൗണ്ടറികളാണ് സജന നേടിയത്. ഏഴ് പന്തിൽ അഞ്ച് റൺസിൽ നിന്നിരുന്ന സ്കോർ 14 പന്തിൽ 25 റൺസായി മാറി.ബാക്ക്‌വേഡ് പോയിന്റ്, ലോങ് ഓൺ, ഡീപ് മിഡ് വിക്കറ്റ് – മൂന്ന് ദിശകളിലായി സജന ബൗണ്ടറികൾ കണ്ടെത്തി. നദീൻ വഴങ്ങിയത് ആകെ 26 റൺസ് മാത്രം; അതിൽ പകുതി സജനയുടെ ബാറ്റിൽ നിന്നായിരുന്നു.

നിക്കോള കാരിയുമായി ചേർന്ന് അഞ്ചാം വിക്കറ്റിൽ 82 റൺസിന്റെ നിർണായക കൂട്ടുകെട്ട്. അതോടെ മുംബൈ ഇന്ത്യൻസ് 150ന് സമീപം എത്തി. അർധ സെഞ്ചുറി തൊട്ടുമുന്നിൽ നിൽക്കെ അവസാന ഓവറിൽ സജന പുറത്തായി. 25 പന്തിൽ 45 റൺസ് – ഏഴ് ഫോറുകളും ഒരു സിക്സും അടങ്ങിയ ഇന്നിങ്സ്. സ്ട്രൈക്ക് റേറ്റ് 180.

ഹർമൻപ്രീത് കൗർ, നാറ്റ് സീവർ-ബ്രണ്ട്, അമേലിയ കേർ തുടങ്ങിയ വമ്പൻ താരങ്ങൾ അടങ്ങിയ നിരയിൽ ഏറ്റവും ഉയർന്ന സ്ട്രൈക്ക് റേറ്റും ടോപ് സ്കോറും സജനക്കായിരുന്നു. “ടീമിനെ കുറഞ്ഞത് 150 റൺസിലെത്തിക്കണമെന്നതായിരുന്നു ലക്ഷ്യം” – മത്സരശേഷം സജന പറഞ്ഞു.

2024ൽ ഡൽഹി ക്യാപിറ്റൽസിനെതിരെ അവസാന പന്തിൽ സിക്സടിച്ച് മുംബൈയെ ജയിപ്പിച്ച അതേ സജന, ഡബ്ല്യുപിഎൽ 2026ലും വീണ്ടും ‘രക്ഷക’യുടെ വേഷം അണിഞ്ഞു. വയനാടിന്റെ അഭിമാനമായ ഈ താരത്തിന്റെ തുടക്കം ഗംഭീരം. ഇനി തുടർച്ചയാകുമോ എന്ന പ്രതീക്ഷയിലാണ് മുംബൈ ഇന്ത്യൻസും ആരാധകരും.