കൊച്ചി: നടിയെ ആക്രമിച്ച കേസിൽ എട്ടാം പ്രതിയായ നടൻ ദിലീപിനെ വെറുതെവിട്ടതായി എറണാകുളം പ്രിൻസിപ്പൽ സെഷൻസ് കോടതി അറിയിച്ചു. ഒന്നാം പ്രതിയായ പൾസർ സുനിയടക്കമുള്ള ആറു പ്രതികളെ കൂട്ടബലാത്സംഗം, തട്ടിക്കൊണ്ടുപോകൽ, ഗൂഢാലോചന എന്നീ കുറ്റങ്ങളിൽ കോടതി കുറ്റക്കാരെന്ന് കണ്ടെത്തി. ഇവർക്കുള്ള ശിക്ഷ ഡിസംബർ 12ന് പ്രസ്താവിക്കും.

കൃത്യത്തിൽ നേരിട്ട് പങ്കെടുത്ത പൾസർ സുനിയടക്കം ആറു പ്രതികളുടെയും കുറ്റം സംശയാതീതമായി തെളിഞ്ഞുവെന്ന് കോടതി വ്യക്തമാക്കി. എന്നാൽ ദിലീപിനെതിരെ ആരോപിച്ചിരുന്ന ക്രിമിനൽ ഗൂഢാലോചനക്കുറ്റം തെളിയിക്കാൻ പ്രോസിക്യൂഷന് സാധിച്ചില്ല എന്നാണ് കോടതി വിലയിരുത്തിയത്. തെളിവുകളുടെ അഭാവമാണ് ദിലീപ് കുറ്റവിമുക്തനാകാൻ കാരണം.

പ്രതികളെ ഒളിവിൽ പോകാൻ സഹായിച്ച ചാർളിയും പത്താം പ്രതിയായ ശരത്തും വെറുതെവിട്ടു. ആറുവർഷം നീണ്ടുനിന്ന വിചാരണയ്ക്ക് ശേഷം ജഡ്ജി ഹണി എം വർഗീസ് തന്നെയാണ് വിധി പ്രസ്താവിച്ചത്.

2017 ഫെബ്രുവരിയിലാണ് നടി കൊച്ചിയിൽ യാത്ര ചെയ്യുന്നതിനിടെ ക്രൂരമായി ആക്രമിക്കപ്പെട്ടത്. കേസിൽ 261 സാക്ഷികളെ വിസ്തരിക്കുകയും 1700 രേഖകൾ പരിഗണിക്കുകയും ചെയ്തു. മൂന്നു പ്രതികളെ മാപ്പു സാക്ഷികളാക്കി. 2012 മുതൽ തന്നെ ദിലീപിന് തനിക്കെതിരെ വിരോധമുണ്ടായിരുന്നുവെന്ന് നടി കോടതിയിൽ മൊഴി നൽകിയിരുന്നു.

രാജ്യം മുഴുവൻ ശ്രദ്ധിച്ചിരുന്ന കേസിൽ ഇന്ന് നിർണായക വിധി വന്നതോടെ കേസിലെ ആറു പ്രതികൾ ഉടൻ റിമാൻഡിൽ പോകും. ഒന്നാം പ്രതി പൾസർ സുനി ഉൾപ്പെടെ ഒന്ന് മുതൽ ആറുവരെയുള്ള പ്രതികളുടെ ജാമ്യം റദ്ദാക്കും.