ആലപ്പുഴ: കടലിൽ വീണ ചരക്കുകണ്ടെയ്നറുകൾ തീരദേശത്ത് അടിയാൻ തുടങ്ങിയതോടെ കൊല്ലം, ആലപ്പുഴ തീരങ്ങളിൽ അതീവ ജാഗ്രത പ്രഖ്യാപിച്ചു. സ്‌ഫോടന സാധ്യത ഉള്ള കാൽസ്യം കാർബൈഡ് അടങ്ങിയ കണ്ടെയ്നറുകളാണ് കടലിൽ വീണത്. തറയിൽക്കടവ് ഭാഗത്ത് കണ്ടെയ്നറുകൾ പൊട്ടിയ നിലയിലാണ് കണ്ടെത്തിയത്. വെള്ളത്തിന് കറുത്ത നിറം തോന്നിയതായും റിപ്പോർട്ടുണ്ട്.

എൻഡിആർഎഫും കസ്റ്റംസും തിരക്കിൽ:
വിദഗ്ധ പരിശോധനയ്ക്കായി എൻഡിആർഎഫും, കൂടംകുളത്ത് നിന്നുള്ള വിദഗ്ധ സംഘവും കൊല്ലത്തേക്ക് പുറപ്പെട്ടിട്ടുണ്ട്. കസ്റ്റംസ് ഉദ്യോഗസ്ഥർ ശക്തികുളങ്ങര തീരത്ത് എത്തി സ്ഥിതിഗതികൾ വിലയിരുത്തിയതായി കസ്റ്റംസ് സൂപ്രണ്ട് വിശാഖ് അറിയിച്ചു. ഓൺലൈൻ യോഗത്തിൽ കണ്ടെയ്നറുകളുടെ നീക്കം സംബന്ധിച്ച് നടപടികൾ തീരുമാനിക്കാനാണ് ഉദ്ദേശിക്കുന്നത്.

കണ്ടെയ്നറുകൾ കൈകാര്യം ചെയ്യുമ്പോൾ ജാഗ്രത അനിവാര്യം:
തീരദേശവാസികൾ കണ്ടെയ്നറുകൾക്കടുത്തേക്ക് പോകരുതെന്നും, കണ്ടെയ്നറുകൾ കൈകാര്യം ചെയ്യരുതെന്നും അധികൃതർ ആവർത്തിച്ചു മുന്നറിയിപ്പ്  നൽകിയിരുന്നു . 

മീൻകൃഷിക്കും സ്വാധീനം:
കടലിൽ രാസവസ്തുക്കൾ കലരുന്നത്  ജൈവവൈവിധ്യത്തെയും മത്സ്യ സമ്പത്തിനെയും ബാധിച്ചേക്കാമെന്ന് കേരള സർവകലാശാല അക്വാടിക് വിഭാഗം മേധാവി ഡോ. റാഫി പറഞ്ഞു. കടൽജല സാമ്പിളുകൾ ശേഖരിച്ച് പഠനം തുടങ്ങിയതായും അദ്ദേഹം വ്യക്തമാക്കി.