കൊച്ചി: പ്രശസ്ത നടനും സഹനിർമ്മാതാവുമായ പൃഥ്വിരാജ് സുകുമാരന് ആദായ നികുതി വകുപ്പ് നോട്ടീസ് അയച്ചതായി അറിയിപ്പുണ്ട്. 2022-ൽ പുറത്തിറങ്ങിയ ഗോൾഡ്, കടുവ, ജനഗണമന എന്നീ ചിത്രങ്ങളുമായി ബന്ധപ്പെട്ട സാമ്പത്തിക ഇടപാടുകളെ കുറിച്ചാണ് വകുപ്പ് വിശദീകരണം തേടുന്നത്. ഈ സിനിമകളിൽ അഭിനയത്തിനായി പൃഥ്വിരാജ് പ്രതിഫലം വാങ്ങിയില്ലെങ്കിലും, സഹനിർമ്മാതാവെന്ന നിലയിൽ ഏകദേശം 40 കോടിയോളം രൂപ കൈപ്പറ്റിയതായി കണ്ടെത്തലുണ്ടായിട്ടുണ്ട്.

നികുതി അടക്കുന്നതിൽ അട്ടിമറി ഉണ്ടോ എന്ന സംശയത്തിലാണ് വിഭാഗം ഇപ്പോൾ നോട്ടീസ് അയച്ചതെന്ന് റിപ്പോർട്ടുകൾ വ്യക്തമാക്കുന്നു. അഭിനേതാക്കളേക്കാൾ സഹനിർമ്മാതാക്കൾക്ക് കുറച്ച് നികുതി ബാധ്യതയുള്ളതുകൊണ്ടാണ് ഈ വിഷയത്തിന് പ്രത്യേക പ്രാധാന്യം നൽകപ്പെട്ടത്.

എമ്പുരാൻ വിവാദങ്ങളുമായി ഇതിന് ബന്ധമില്ലെന്നും, ഇത് മുഴുവനും 2022ലെ സിനിമകളുമായി ബന്ധപ്പെട്ട അന്വേഷണത്തിന്റെ തുടർച്ചയാണെന്നും ആദായ നികുതി വകുപ്പ് അധികൃതർ അറിയിച്ചു. മാർച്ച് 29ന് അയച്ച നോട്ടീസിന്റെ അടിസ്ഥാനത്തിൽ, ഏപ്രിൽ 29നകം പൃഥ്വിരാജ് വിശദീകരണം സമർപ്പിക്കണമെന്ന് വകുപ്പിന്റെ നിർദേശം.