ദിലീപ് നായകനായി എത്തുന്ന ‘ഭഭബ’യെക്കുറിച്ചുള്ള അഭ്യൂഹങ്ങൾക്കും പ്രതീക്ഷകൾക്കും നടുവിൽ, ട്രെയിലർ റിലീസ് സംബന്ധിച്ച ഔദ്യോഗിക പ്രതികരണവുമായി തിരക്കഥാകൃത്തായ നൂറിൻ ഷെരീഫ് രംഗത്തെത്തി. ഡിസംബർ 8ന് ട്രെയിലർ പുറത്തിറങ്ങുമെന്ന പ്രചാരണം വേഗത്തിൽ സോഷ്യൽ മീഡിയയിൽ വ്യാപിച്ചെങ്കിലും, അത് സ്ഥിരീകരിക്കുന്ന വിവരങ്ങൾ ടീം പുറത്തുവിട്ടിരുന്നില്ല.

“ഭഭബയുടെ ട്രെയിലർ ഡിസംബർ 8ന് റിലീസ് ചെയ്യുമെന്ന് ഞങ്ങൾ പറഞ്ഞിട്ടില്ല. എന്തെങ്കിലും ഉണ്ടെങ്കിൽ അത് ഔദ്യോഗികമായി അറിയിക്കും. ചിത്രം ഡിസംബർ 18ന് റിലീസ് ചെയ്യും,” എന്നാണ് നൂറിൻ ഷെരീഫിന്റെ പ്രതികരണം. ഫാഹിം സഫറിനൊപ്പം ചേർന്നാണ് അവർ ചിത്രത്തിന്റെ തിരക്കഥ ഒരുക്കിയത്.

ദിലീപ്, ധ്യാൻ ശ്രീനിവാസൻ, വിനീത് ശ്രീനിവാസൻ എന്നിവരുടെ ത്രിമാന കോമ്പോയോടൊപ്പം മോഹൻലാലും അതിഥി വേഷത്തിലും ഗാനരംഗത്തും എത്തുന്ന ചിത്രം ഇപ്പോൾ മലയാള സിനിമപ്രേമികളുടെ പ്രധാന ചര്‍ച്ചാവിഷയമാണ്.

മാസ് കോമഡി എന്റർടെയ്നറായി ഒരുങ്ങുന്ന ‘ഭഭബ’യിൽ സിദ്ധാർത്ഥ് ഭരതൻ, ബൈജു സന്തോഷ്, ബാലു വർഗീസ്, അശോകൻ, നോബി, സെന്തിൽ കൃഷ്ണ, ശരണ്യ പൊൻവണ്ണൻ, ധനശ്രീ അടക്കമുള്ളവരും പ്രധാന വേഷങ്ങളിൽ എത്തുന്നു.