ബാങ്കോക്ക്: മ്യാൻമറിനെയും തായ്‌ലൻഡിനെയും വൻ ആഘാതത്തിൽ ആക്കിയ ഭൂചലനത്തിൽ മരണസംഖ്യ 700 കവിഞ്ഞതായി റിപ്പോർട്ട്. 1500ൽ അധികം പേർക്ക് പരിക്കേറ്റതായും, നിരവധിപേർ തകർന്ന കെട്ടിടങ്ങളിലകപ്പെട്ടിരിക്കാനിടയുണ്ടെന്നുമാണ് പ്രാഥമിക വിവരം.

വെള്ളിയാഴ്ച ഉച്ചയ്ക്ക് 12:50ന് മ്യാൻമറിലെ സാഗൈങ്ങിന്റെ വടക്കുപടിഞ്ഞാറൻ മേഖലയിൽ 7.7 തീവ്രതയിലായിരുന്നു ഭൂചലനം അനുഭവപ്പെട്ടത്. 10 കിലോമീറ്റർ ആഴത്തിലാണ് ഭൂകമ്പത്തിന്റെ പ്രഭവകേന്ദ്രം. തുടർന്നും 6.7 തീവ്രത രേഖപ്പെടുത്തിയ മറ്റൊരു ഭൂചലനവും തുടർചലനങ്ങളും അനുഭവപ്പെട്ടു.

ഇന്ത്യയുടെ പടിഞ്ഞാറൻ മേഖലകളിലും ചൈനയുടെ കിഴക്കൻ ഭാഗത്തും കംബോഡിയ, ലാവോസ് തുടങ്ങിയ അയൽരാജ്യങ്ങളിലും ഭൂചലനത്തിന്റെ നേരിയ ആഘാതം അനുഭവപ്പെട്ടു. മ്യാൻമറിലെ സൈനിക ഭരണകൂടം പുറത്ത് വിട്ട ഔദ്യോഗിക പ്രസ്താവനയിൽ മരണസംഖ്യ 694 ആയി സ്ഥിരീകരിച്ചു. ആഭ്യന്തര സംഘർഷം തുടരുന്ന രാജ്യത്തിൽ അടിയന്തര രക്ഷാപ്രവർത്തനങ്ങൾ ദുർബലമാകുന്നതായി വിമർശനം ഉയർന്നു.

തായ്‍ലൻഡിൽ 10 പേർക്ക് ജീവൻ നഷ്ടമായി. തലസ്ഥാനമായ ബാങ്കോക്കിൽ ചാറ്റുചക് മാർക്കറ്റിന് സമീപം നിർമ്മാണത്തിലുണ്ടായിരുന്ന ഒരു ബഹുനില കെട്ടിടം തകർന്നതോടെ 100ഓളം തൊഴിലാളികൾ അവശിഷ്ടങ്ങൾക്കിടയിൽ കുടുങ്ങിയിരിക്കുമെന്ന് റിപ്പോർട്ടുകൾ വ്യക്തമാക്കുന്നു. രക്ഷാപ്രവർത്തനം തുടരുകയാണ്, കൂടുതൽ ആളുകൾക്ക് ജീവൻ നഷ്ടപ്പെടാനിടയുണ്ടെന്നാണ് കരുതുന്നത്.