ഇന്‍ഡോര്‍: രഞ്ജി ട്രോഫി മത്സരത്തില്‍ മധ്യ പ്രദേശിനെതിരെ കേരളം 281 റണ്‍സിന് പുറത്തായി. ഹോള്‍ക്കര്‍ സ്റ്റേഡിയത്തില്‍ ടോസ് നഷ്ടപ്പെട്ട് ബാറ്റിംഗിന് ഇറങ്ങിയ കേരളത്തിന്റെ ഇന്നിങ്സിന് ആധാരമായത് ബാബാ അപരാജിതിന്റേതായിരുന്നു. സെഞ്ചുറി അതിര്ത്തി തൊട്ടെങ്കിലും 98 റണ്‍സിലാണ് അദ്ദേഹം പുറത്തായത്. അഭിജിത് പ്രവീണ്‍ (60), അഭിഷേക് ജെ നായര്‍ (47) എന്നിവരും വിലപ്പെട്ട സംഭാവന നല്‍കി.

മധ്യ പ്രദേശിന് വേണ്ടി മുഹമ്മദ് അര്‍ഷദ് ഖാന്‍ നാല് വിക്കറ്റും സരണ്‍ഷ് ജെയിന്‍ മൂന്ന് വിക്കറ്റും വീഴ്ത്തി. മറുപടി ബാറ്റിംഗില്‍ മധ്യ പ്രദേശ് ആദ്യ വിക്കറ്റ് നഷ്ടപ്പെടുത്തി ലഞ്ച് സമയത്ത് ഒരു വിക്കറ്റ് നഷ്ടത്തില്‍ എട്ട് റണ്‍സ് എന്ന നിലയിലാണ്. യശ് ദുബെ (0) ആണ് പുറത്തായത്. ഹര്‍ഷ് ഗവാലി (8*) ക്രീസിലുണ്ട്. അഭിജിത് പ്രവീണ്‍ ആണ് വിക്കറ്റ് സ്വന്തമാക്കിയത്.

ഏഴ് വിക്കറ്റിന് 246 റണ്‍സെന്ന നിലയിലായിരുന്നു കേരളം രണ്ടാം ദിവസം കളി തുടങ്ങിയത്. സ്കോറില്‍ മാറ്റമില്ലാതെ ശ്രീഹരി എസ് നായര്‍ (7) പുറത്തായി. പിന്നാലെ സെഞ്ചുറിയിലേക്കെത്തിയിരുന്ന അപരാജിതും പവലിയനിലേക്ക്. എട്ട് ബൗണ്ടറികളാണ് അദ്ദേഹത്തിന്റെ ഇന്നിങ്സില്‍ ഉണ്ടായത്. നിതീഷ് എം ഡിയും (7) പുറത്തായതോടെ കേരളം സമ്മര്‍ദ്ദത്തിലായി. എദന്‍ ആപ്പിള്‍ ടോം (9*) പുറത്താകാതെ നിന്നു.

ഒരു ഘട്ടത്തില്‍ ആറിന് 105 റണ്‍സ് എന്ന നിലയില്‍ തകര്‍ന്ന കേരളത്തെ രക്ഷപ്പെടുത്തിയത് അപരാജിതും അഭിജിത് പ്രവീണും ചേര്‍ന്ന കൂട്ടുകെട്ടാണ്. ഏഴാം വിക്കറ്റില്‍ ഇരുവരും ചേര്‍ന്ന് 122 റണ്‍സ് കൂട്ടിച്ചേര്‍ത്തു. 42 ഓവര്‍ നീണ്ട ഈ കൂട്ടുകെട്ടിന് ജെയിന്‍ അഭിജിതിനെ പുറത്താക്കി വിരാമമിട്ടു.

അഭിഷേക് ജെ നായര്‍, അഭിജിത് പ്രവീണ്‍, ശ്രീഹരി എസ് നായര്‍ എന്നിവരാണ് കേരളത്തിന് വേണ്ടി രഞ്ജിയില്‍ അരങ്ങേറ്റം കുറിച്ചത്.