ദില്ലി: റിസർവ് ബാങ്ക് റിപ്പോ നിരക്കിൽ 25 ബേസിസ് പോയിന്റ് കുറവ് പ്രഖ്യാപിച്ചു. റിസർവ് ബാങ്ക് ഗവർണർ സഞ്ജയ് മൽഹോത്രയുടെ നേതൃത്വത്തിൽ ചേർന്ന മോണിറ്ററി പോളിസി കമ്മിറ്റിയുടെ യോഗത്തിനുശേഷമാണ് റിപ്പോ നിരക്ക് 5.25 ശതമാനമായി കുറച്ചതായി അറിയിച്ചത്.

ഫെബ്രുവരി മുതൽ മൂന്നു ഘട്ടങ്ങളിലായി മൊത്തം 100 ബേസിസ് പോയിന്റ് കുറവ് നടത്തിയതിന് ശേഷമാണ് പുതിയ തീരുമാനം പുറത്തുവന്നത്. രാജ്യത്തെ പണപ്പെരുപ്പ നിരക്ക് സ്ഥിരതയാർജിച്ചും കുറയുന്ന പ്രവണത കാട്ടുന്നതിനാലാണ് ആർബിഐ പലിശ നിരക്ക് കുറയ്ക്കാൻ തീരുമാനിച്ചതെന്ന് സർക്കുലറിൽ വ്യക്തമാക്കി.

പലിശ നിരക്കിലെ ഈ മാറ്റം ഹോം ലോൺ, വാഹന ലോൺ, വ്യക്തിഗത വായ്പകൾ എന്നിവയുള്‍പ്പെടെ ബാങ്ക് വായ്പകൾ എടുക്കുന്നവർക്കാണ് കൂടുതലായി ഗുണം ചെയ്യുക. പല ബാങ്കുകളും വരും ദിവസങ്ങളിൽ പലിശ നിരക്കുകൾ പരിഷ്‌കരിക്കുമെന്നാണ് പ്രതീക്ഷ.