മമ്മൂട്ടിയെയും വിനായകനെയും പ്രധാന കഥാപാത്രങ്ങളാക്കി ജിതിൻ ജോസ് സംവിധാനം ചെയ്ത ‘കളങ്കാവൽ’ പ്രേക്ഷക പ്രതികരണങ്ങളിൽ വമ്പൻ വിജയമാകുന്നു. എട്ട് മാസത്തിന് ശേഷം തിയേറ്ററിലെത്തിയ മമ്മൂട്ടി ചിത്രത്തിന് ആദ്യ ഷോയ്ക്കുപിന്നാലെ തന്നെ അസാധാരണമായ വരവേൽപ്പാണ് ലഭിക്കുന്നത്. യഥാർത്ഥ സംഭവങ്ങളിൽ നിന്നും പ്രചോദനം ഉൾക്കൊണ്ടാണ് ചിത്രം ഒരുക്കിയിരിക്കുന്നത്.

മമ്മൂട്ടിയുടെ കരിയറിലെ ഇതുവരെ കാണാത്ത തരം കഥാപാത്രവും അതുല്യമായ ഭാവപ്രകടനവുമാണ് ചിത്രത്തിലെ ഹൈലൈറ്റ് എന്ന് ആദ്യ റിപ്പോർട്ടുകൾ സൂചിപ്പിക്കുന്നു. ശക്തമായ ആദ്യ പകുതിയും തകർപ്പൻ ഇന്റർവെൽ ബ്ലോക്കും സിനിമയെ അടുത്ത നിലയിലേക്ക് ഉയർത്തുന്നുവെന്നാണ് ആദ്യ ഷോ കഴിഞ്ഞിറങ്ങിയ പ്രേക്ഷക അഭിപ്രായം. പോലീസ് വേഷത്തിലെത്തിയ വിനായകൻ നിഗൂഢതയും കരുത്തും നിറഞ്ഞ പ്രകടനം കാഴ്ചവെക്കുന്നു. രജീഷ് വിജയൻ, ഗായത്രി അരുണ് എന്നിവരടക്കം 21 നായികമാർ അഭിനയിച്ചിരിക്കുന്നതും ചിത്രത്തെ കൂടുതൽ സമ്പന്നമാക്കുന്നുവെന്ന് പ്രതികരണങ്ങൾ വ്യക്തമാക്കുന്നു.

ഗൾഫിൽ മലയാള സിനിമാ ചരിത്രത്തിലെ രണ്ടാമത്തെ ഏറ്റവും വലിയ റിലീസായി ‘കളങ്കാവൽ’ എത്തിയത് വലിയ ചർച്ചയാകുന്നു. 144 ലൊക്കേഷനുകളിലാണ് ചിത്രം ഗൾഫിൽ റിലീസ് ചെയ്തത്. കേരളത്തിലെ പ്രീസെയിൽ രണ്ട് കോടിയിലേക്ക് കുതിക്കുന്നതായും ഇതിനോടകം ഒരു ലക്ഷത്തിലധികം ടിക്കറ്റുകൾ വിറ്റഴിഞ്ഞതായും റിപ്പോർട്ടുകൾ. മമ്മൂട്ടി കമ്പനിയുടെ ബാനറിൽ നിർമ്മിക്കുന്ന ഏഴാമത്തെ ചിത്രമാണിത്. കേരളത്തിൽ വിതരണം വേഫറർ ഫിലിംസ് നിർവഹിക്കുന്നു.

ചിത്രത്തിന്റെ തിരക്കഥ ജിഷ്ണു ശ്രീകുമാറും ജിതിൻ കെ ജോസും ചേർന്നാണ് എഴുതിയത്. ട്രൂത് ഗ്ലോബൽ ഫിലിംസ് ഓവർസീസ് ഡിസ്ട്രിബ്യൂഷൻ കൈകാര്യം ചെയ്യുമ്പോൾ, തമിഴ്‌നാട്ടിൽ ഫ്യൂച്ചർ റണ്ണപ് ഫിലിംസ്, തെലുങ്കിൽ സിതാര എന്റർടെയിൻമെന്റ്സ്, കർണാടകയിൽ ലൈറ്റർ ബുദ്ധ ഫിലിംസ്, നോർത്ത് ഇന്ത്യയിൽ പെൻ മരുധാർ എന്നിങ്ങനെ വിവിധ ബാനറുകൾ ചിത്രത്തിന്റെ റിലീസ് നടത്തുന്നു.