കൊച്ചി: വൻ വിവാദങ്ങൾക്കിടയാക്കിയ ദ കേരള സ്റ്റോറിയുടെ രണ്ടാം ഭാഗമായ **‘ദ കേരള സ്റ്റോറി 2’**ന്റെ ടീസർ പുറത്തിറങ്ങി. ആദ്യ ഭാഗത്തിൽ കേരളത്തിൽ നിന്നുള്ള ശാലിനി ഉണ്ണികൃഷ്ണൻ എന്ന കഥാപാത്രമായിരുന്നുവെങ്കിൽ, രണ്ടാം ഭാഗത്തിൽ കേന്ദ്ര കഥാപാത്രമായി എത്തുന്നത് സുരേഖ നായർ എന്ന പേരിലാണ്. മൂന്ന് പ്രധാന കഥാപാത്രങ്ങളെ പരിചയപ്പെടുത്തുന്ന രീതിയിലാണ് ടീസർ അവതരിപ്പിച്ചിരിക്കുന്നത്. ‘ബിയോണ്ട് ദി കേരള സ്റ്റോറി’ എന്ന ടാഗ്‌ലൈനോടെയാണ് ചിത്രം പ്രചാരണം നടത്തുന്നത്.

2.06 മിനിറ്റ് ദൈർഘ്യമുള്ള ടീസർ ഫെബ്രുവരി 27ന് ചിത്രം തിയറ്ററുകളിലെത്തും എന്ന അറിയിപ്പോടെയാണ് പുറത്തുവിട്ടത്. “നമ്മുടെ പെൺകുട്ടികൾ പ്രണയത്തിലല്ല, മറിച്ച് കെണികളിലാണ് വീഴുന്നത്. ഇനി ഞങ്ങൾ ഇത് സഹിക്കില്ല, പോരാടും” എന്ന ക്യാപ്ഷനോടെയാണ് ടീസർ റിലീസ് ചെയ്തത്. യഥാർഥ സംഭവങ്ങളിൽ നിന്ന് പ്രചോദനം ഉൾക്കൊണ്ട കഥയാണെന്ന് നിർമാതാക്കൾ അവകാശപ്പെടുന്നു.

ടീസർ പുറത്തിറങ്ങിയതിന് പിന്നാലെ സോഷ്യൽ മീഡിയയിൽ ശക്തമായ പ്രതികരണങ്ങളാണ് ഉയരുന്നത്. വിമർശനങ്ങളോടൊപ്പം പരിഹാസ ട്രോളുകളും വ്യാപകമാണ്. “ഇതിലെവിടെയാണ് കേരള സ്റ്റോറി?”, “മുല്ലപ്പൂ ആട്ടൽ മിസ്സിംഗ്”, “അടുത്ത ഓസ്കറിന് തയ്യാറെടുപ്പ്” എന്നിങ്ങനെയുള്ള കമന്റുകൾ സാമൂഹിക മാധ്യമങ്ങളിൽ ശ്രദ്ധ നേടുകയാണ്. ചിത്രം വീണ്ടും കേരളത്തെ മോശമായി ചിത്രീകരിക്കുന്ന പ്രൊപ്പഗണ്ടയാണെന്ന ആരോപണങ്ങളും ഉയരുന്നുണ്ട്.

ദേശീയ അവാർഡ് ജേതാവായ കാമാഖ്യ നാരായണ സിങ് ആണ് ദ കേരള സ്റ്റോറി 2 സംവിധാനം ചെയ്യുന്നത്. വിപുൽ ഷാ നിർമിക്കുന്ന ചിത്രത്തിൽ ആഷിൻ എ. ഷാ സഹനിർമാതാവാണ്. ആദ്യ ഭാഗം സംവിധാനം ചെയ്തത് സുദീപ്തോ സെൻ ആയിരുന്നു. വലിയ വിമർശനങ്ങൾ നേരിട്ട ആദ്യ ചിത്രത്തിന് രണ്ട് ദേശീയ ചലച്ചിത്ര അവാർഡുകൾ ലഭിച്ചതിനെതിരെയും അന്ന് വ്യാപക പ്രതിഷേധങ്ങൾ ഉണ്ടായിരുന്നു. ദേശീയ അവാർഡുകളുടെ നിലവാരത്തെക്കുറിച്ചും വിമർശനങ്ങൾ ഉയർന്നിരുന്നു.

ടീസർ വിവാദങ്ങൾക്ക് തിരികൊളുത്തിയതോടെ, ചിത്രം റിലീസാകുന്നതിന് മുമ്പേ തന്നെ വീണ്ടും കടുത്ത ചർച്ചകളുടെ കേന്ദ്രമായിരിക്കുകയാണ്.