ബ്രസീലിയ: ബ്രസീലിൽ ഇന്ത്യയുടെ പ്രധാനമന്ത്രി നരേന്ദ്ര മോദിക്ക് ഹൃദയസ്പർശിയായ സ്വീകരണം. പഞ്ചരാജ്യ പര്യടനങ്ങളുടെ ഭാഗമായി ബ്രസീലിയയിൽ എത്തിയ മോദിയെ ബ്രസീലിന്റെ പ്രതിരോധമന്ത്രി ജോസ് മുസിയോ മൊണ്ടെയ്‌റോ ഫിൽഹോ വിമാനത്താവളത്തിൽ ഔദ്യോഗികമായി സ്വീകരിച്ചു. പ്രധാനമന്ത്രിയെ കാണാൻ ഇന്ത്യൻ സമൂഹം ഏറെ ആവേശത്തോടെ എത്തുകയും ഹൃദയപൂർവ്വം വരവേറ്റുകയും ചെയ്തു.

പ്രധാനമന്ത്രിയുടെ സന്ദർശനത്തെ ‘സ്റ്റേറ്റ് വിസിറ്റ്’ തലത്തിലേക്ക് ഉയർത്തിയ ബ്രസീൽ സര്‍ക്കാര്‍, അഞ്ചു പതിറ്റാണ്ടിനു ശേഷമുള്ള അപൂർവമായ അംഗീകാരമാണ് നൽകിയിരിക്കുന്നത്. ഇന്ന് പ്രധാനമന്ത്രി ബ്രസീൽ പ്രസിഡന്‍റ് ലുല ദ സിൽവയുമായി ഔദ്യോഗിക ചർച്ചകൾ നടത്തും.

പ്രതികരണമായി പ്രധാനമന്ത്രി മോദി X (മുന്‍ ട്വിറ്റര്‍) വഴി ബ്രസീലിന്റെ സ്‌നേഹപൂർവമായ സ്വീകരണത്തിന് നന്ദി അറിയിച്ചു. ബ്രിക്സ് ഉച്ചകോടിക്ക് ശേഷം റിയോ ഡി ജനൈറോയില്‍ നിന്നും ബ്രസീലിയയിലേക്കാണ് അദ്ദേഹം എത്തിയത്.

സന്ദർശനം അവസാനിച്ചതിന് ശേഷം, ഇന്ത്യൻ സമയം നാളെ പുലർച്ചെ 1 മണിക്ക് പ്രധാനമന്ത്രി നമീബിയയിലേക്ക് തിരിക്കും. കഴിഞ്ഞ ദിവസം നടന്ന ബ്രിക്സ് ഉച്ചകോടിയിൽ, “ഒരു ലോകം, ഒരു ആരോഗ്യ സംവിധാനം” എന്ന ആശയം പ്രധാനമന്ത്രി ശക്തമായി മുന്നോട്ടുവച്ചു. ആരോഗ്യ സംരക്ഷണത്തിനായി രാജ്യങ്ങൾ തമ്മിൽ സഹകരണം ശക്തമാക്കണമെന്നും അദ്ദേഹം ആവശ്യപ്പെട്ടു.