രാജ്യത്ത് വാണിജ്യ എൽപിജി സിലിണ്ടറുകളുടെ ക്ഷാമം രൂക്ഷമാകുന്നതോടെ ഹോട്ടൽ-റെസ്റ്റോറന്റ് മേഖലയിലും കാറ്ററിംഗ് സ്ഥാപനങ്ങളിലും കടുത്ത പ്രതിസന്ധി നിലനിൽക്കുന്നു. വാണിജ്യ സിലിണ്ടറുകളുടെ ലഭ്യത കുറഞ്ഞതോടെ നിരവധി ഹോട്ടലുകൾ പ്രവർത്തനം താൽക്കാലികമായി നിർത്തിയിരിക്കുകയാണ്. നഗരങ്ങളിലുടനീളം ഭക്ഷണശാലകൾക്കും ഹോസ്റ്റലുകൾക്കും പിജി താമസ സൗകര്യങ്ങൾക്കും വലിയ തിരിച്ചടിയാണ് ഉണ്ടായിരിക്കുന്നത്.

വാണിജ്യ എൽപിജി സിലിണ്ടറുകളുടെ വിതരണത്തിൽ ഉണ്ടായ തടസ്സം മൂലം ഭക്ഷ്യവിതരണ മേഖലയിലെ പ്രവർത്തനങ്ങൾ തന്നെ ബാധിക്കപ്പെട്ടതായി വ്യാപാര സംഘടനകൾ പറയുന്നു. പ്രത്യേകിച്ച് നഗര പ്രദേശങ്ങളിലെ ചെറിയ ഹോട്ടലുകളും കാറ്ററിംഗ് സ്ഥാപനങ്ങളും ഏറ്റവും കൂടുതൽ ബുദ്ധിമുട്ട് നേരിടുന്നുവെന്നാണ് റിപ്പോർട്ടുകൾ.

സംസ്ഥാനത്ത് വാണിജ്യ സിലിണ്ടറുകളുടെ പരിധി വർധിപ്പിക്കണമെന്ന് ആവശ്യപ്പെട്ട് കേന്ദ്രസർക്കാരിനോട് ആവശ്യപ്പെടുമെന്ന് ഭക്ഷ്യമന്ത്രി ജി.ആർ. അനിൽ അറിയിച്ചു. കൂടാതെ റേഷൻ മണ്ണെണ്ണയുടെ വിഹിതം വർധിപ്പിക്കാനും സർക്കാർ ആലോചിക്കുന്നതായി അദ്ദേഹം വ്യക്തമാക്കി. എൽപിജി ക്ഷാമം മൂലം സാധാരണ ജനജീവിതത്തെയും ഭക്ഷണവിതരണ സംവിധാനത്തെയും ബാധിക്കാതിരിക്കാനുള്ള നടപടികൾ സ്വീകരിക്കുമെന്നും മന്ത്രി പറഞ്ഞു.

ഇതിനിടെ വിഷയത്തിൽ പാർലമെന്റിനകത്തും പുറത്തും രാഷ്ട്രീയ വിവാദം ശക്തമായി. എൽപിജി ക്ഷാമം സംബന്ധിച്ച് അടിയന്തര ചർച്ച നടത്തണമെന്നാവശ്യപ്പെട്ട് പ്രതിപക്ഷ പാർട്ടികൾ പ്രതിഷേധിച്ചു. കോൺഗ്രസ് എംപിമാർ ‘മോദിജി എൽപിജി’ എന്ന മുദ്രാവാക്യം മുഴക്കി പാർലമെന്റിൽ പ്രതിഷേധിച്ചതോടെ സഭ താൽക്കാലികമായി നിർത്തിവയ്ക്കേണ്ടിവന്നു.

പാർലമെന്റ് സമുച്ചയത്തിന് പുറത്തും പ്രതിപക്ഷ എംപിമാർ എൽപിജി സിലിണ്ടറുകളുടെ ചിത്രങ്ങളുമായി പ്രതിഷേധം നടത്തി. വിഷയത്തെക്കുറിച്ച് വിശദീകരിക്കാൻ കേന്ദ്ര സർക്കാർ ഇന്ന് വൈകിട്ട് വാർത്താസമ്മേളനം വിളിച്ചിട്ടുണ്ട്.

അതേസമയം, എൽപിജി സിലിണ്ടറുകളുടെ പൂഴ്ത്തിവെപ്പും കരിഞ്ചന്തയും തടയാൻ വിവിധ സംസ്ഥാനങ്ങൾ ശക്തമായ നടപടികൾ ആരംഭിച്ചിട്ടുണ്ട്. മഹാരാഷ്ട്രയും ഉത്തർപ്രദേശും പ്രത്യേക കൺട്രോൾ റൂമുകൾ ആരംഭിച്ചു. യുപിയിൽ ഇതിനകം 200ലധികം സിലിണ്ടറുകൾ അനധികൃതമായി സംഭരിച്ചതായി കണ്ടെത്തി പിടികൂടിയിട്ടുണ്ട്.

ദില്ലിയിലെ നിലവിലെ സാഹചര്യങ്ങൾ കേന്ദ്ര സർക്കാർ നേരിട്ട് വിലയിരുത്തുന്നുണ്ട്. എൽപിജിക്ക് പകരമായി മറ്റ് ഇന്ധനങ്ങൾ ഉപയോഗിക്കാൻ ഹോട്ടലുകൾക്കും റെസ്റ്റോറന്റുകൾക്കും സർക്കാർ നിർദേശം നൽകിയിട്ടുണ്ട്.

ഇതിനിടെ സ്വകാര്യ ഗ്യാസ് കമ്പനികൾ സിലിണ്ടറുകൾ വിതരണം ചെയ്യാത്തതിനെതിരെ മഹാരാഷ്ട്രയിലെ ആറു എൽപിജി വിതരണക്കാർ സമർപ്പിച്ച ഹർജിയിൽ ബോംബെ ഹൈക്കോടതി കേന്ദ്ര പെട്രോളിയം മന്ത്രാലയത്തിന് നോട്ടീസ് അയച്ചു. ചില കമ്പനികൾ സിലിണ്ടറുകൾ വിതരണം ചെയ്യാതെ പിടിച്ചുവെക്കുന്നുവെന്നാണ് ഹർജിയിൽ ആരോപണം.

രാജ്യത്ത് വാണിജ്യ എൽപിജി വിതരണം സാധാരണ നിലയിലാകുന്നതുവരെ ഹോട്ടൽ-റെസ്റ്റോറന്റ് മേഖലയ്ക്ക് വലിയ പ്രതിസന്ധി തുടരാനിടയുണ്ടെന്നാണ് വ്യവസായ മേഖലയിലെ വിലയിരുത്തൽ.