മുംബൈ: ടി20 ലോകകപ്പ് ആരംഭിക്കാൻ മണിക്കൂറുകൾ മാത്രം ശേഷിക്കെ ഇന്ത്യൻ ടീമിന് കനത്ത തിരിച്ചടിയായി ഓൾറൗണ്ടർ ഹർഷിത് റാണയ്ക്ക് ടൂർണമെന്റ് നഷ്ടമാകുന്നു. സന്നാഹ മത്സരത്തിനിടെ പരിക്കേറ്റ ഹർഷിത് റാണ ഇനി ലോകകപ്പിൽ കളിക്കില്ല. ദക്ഷിണാഫ്രിക്കയ്‌ക്കെതിരായ സന്നാഹ മത്സരത്തിനിടെയാണ് താരം കാൽമുട്ടിന് പരിക്ക് അനുഭവപ്പെട്ടത്.

നവി മുംബൈയിലെ ഡി.വൈ. പാട്ടീൽ സ്റ്റേഡിയത്തിൽ ബുധനാഴ്ച നടന്ന മത്സരത്തിൽ ഒരു ഓവർ മാത്രമാണ് ഹർഷിത് റാണ എറിഞ്ഞത്. റണ്ണപ്പിനിടെ രണ്ട് തവണ ശ്രമിച്ചെങ്കിലും വേദന മൂലം റണ്ണപ്പ് പൂർത്തിയാക്കാൻ കഴിയാതെ വന്ന താരം, മുട്ടിൽ പിടിച്ചുകൊണ്ട് മുടന്തിയാണ് ഗ്രൗണ്ട് വിട്ടത്. ആ ഒരോവറിൽ 16 റൺസാണ് താരം വഴങ്ങിയത്.

പരിക്ക് ഗുരുതരമാണെന്ന് പ്രാഥമിക പരിശോധനയിൽ വ്യക്തമായതോടെയാണ് ഹർഷിത് റാണയെ ലോകകപ്പ് ടീമിൽ നിന്ന് ഒഴിവാക്കാൻ തീരുമാനിച്ചത്. താരത്തിന് പകരമായി മുഹമ്മദ് സിറാജിനെ ടീമിൽ ഉൾപ്പെടുത്തിയതായാണ് റിപ്പോർട്ട്. ഇക്കാര്യം ബിസിസിഐ ഔദ്യോഗികമായി പ്രഖ്യാപിക്കാനിരിക്കുന്നതേയുള്ളൂ. നേരത്തെ തന്നെ ഇന്ത്യൻ താരം സൂര്യകുമാർ യാദവ് ഹർഷിത് റാണയ്ക്ക് പരിക്കേറ്റ വിവരം സ്ഥിരീകരിച്ചിരുന്നു.

ബാറ്റിങ്ങിലും ബൗളിങ്ങിലും ഒരുപോലെ സംഭാവന നൽകാൻ കഴിയുന്ന താരമായതിനാൽ ഹർഷിത് റാണയുടെ അഭാവം ഇന്ത്യയുടെ ടീം ബാലൻസിനെ ബാധിക്കുമെന്ന ആശങ്കയും ശക്തമാണ്. അതേസമയം, ഇന്ത്യയുടെ ക്യാമ്പിൽ ഫിറ്റ്‌നസ് ആശങ്കകൾ ഇതോടെ അവസാനിക്കുന്നില്ല. ന്യൂസിലൻഡിനെതിരായ ഏകദിന പരമ്പരയ്ക്കിടെ വാരിയെല്ലിന് പരിക്കേറ്റ വാഷിങ്ടൺ സുന്ദർ ഇപ്പോഴും പൂർണ ആരോഗ്യത്തിലേക്ക് തിരിച്ചെത്തിയിട്ടില്ല.

ലോകകപ്പിന് മുമ്പായി സുന്ദർ പൂർണമായും ഫിറ്റാവുമെന്നാണ് ടീം മാനേജ്മെന്റിന്റെ പ്രതീക്ഷ. അതേസമയം, കഴിഞ്ഞ മാസം ശസ്ത്രക്രിയയ്ക്ക് വിധേയനായ തിലക് വർമ്മ ബാറ്റിംഗ് നിരയിൽ തിരിച്ചെത്തിയത് ഇന്ത്യക്ക് വലിയ ആശ്വാസമാണ്. സന്നാഹ മത്സരത്തിൽ 19 പന്തിൽ 45 റൺസ് നേടി തിലക് മികച്ച ഫോം പ്രകടിപ്പിച്ചിരുന്നു.

ഇന്ത്യയുടെ ലോകകപ്പ് യാത്ര ഫെബ്രുവരി ഏഴിന് മുംബൈ വാംഖഡെ സ്റ്റേഡിയത്തിൽ അമേരിക്കയ്‌ക്കെതിരായ മത്സരത്തോടെ ആരംഭിക്കും. പ്രധാന താരങ്ങളുടെ ഫിറ്റ്‌നസ് ഇന്ത്യയുടെ ലോകകപ്പ് പ്രതീക്ഷകളിൽ നിർണായക ഘടകമാകുമെന്നാണ് കായിക ലോകത്തിന്റെ വിലയിരുത്തൽ.