ഐസിസി ടി20 ലോകകപ്പ് 2026 ഫൈനലിൽ ന്യൂസിലൻഡിനെ 96 റൺസിന് തോൽപ്പിച്ച് ടീം ഇന്ത്യ വീണ്ടും ലോകചാമ്പ്യന്മാരായി. ഇതോടെ മൂന്നാം തവണയാണ് ഇന്ത്യ ടി20 ലോകകപ്പ് കിരീടം സ്വന്തമാക്കുന്നത്. ആവേശകരമായ ഫൈനൽ മത്സരത്തിൽ ബാറ്റിംഗിലും ബൗളിംഗിലും മികച്ച പ്രകടനം കാഴ്ചവച്ചാണ് ഇന്ത്യ വമ്പൻ വിജയം നേടിയത്.

ടോസ് നഷ്ടപ്പെട്ട് ആദ്യം ബാറ്റിംഗ് ചെയ്ത ഇന്ത്യ 20 ഓവറിൽ അഞ്ച് വിക്കറ്റ് നഷ്ടത്തിൽ 255 റൺസ് എന്ന കൂറ്റൻ സ്കോർ നേടി. ഇന്ത്യൻ നിരയിൽ സഞ്ജു സാംസൺ, അഭിഷേക് ശർമ്മ, ഇഷാൻ കിഷൻ എന്നിവർ നടത്തിയ അതിഗംഭീര പ്രകടനമാണ് ടീമിന് കരുത്തായത്.

ഓപ്പണറായി ഇറങ്ങിയ സഞ്ജു സാംസൺ 46 പന്തിൽ 89 റൺസ് നേടി ഇന്ത്യൻ ഇന്നിങ്സിന്റെ തൂണായി. അഞ്ച് ഫോറുകളും എട്ട് സിക്സറുകളും ഉൾപ്പെട്ട ഈ ഇന്നിങ്‌സ് ഫൈനലിലെ മികച്ച പ്രകടനങ്ങളിലൊന്നായി മാറി. അഭിഷേക് ശർമ്മ 21 പന്തിൽ 52 റൺസ് നേടി അർധസെഞ്ച്വറി നേടി. ആറു ഫോറുകളും മൂന്ന് സിക്സറുകളും ഉൾപ്പെട്ടതാണ് അദ്ദേഹത്തിന്റെ ഇന്നിങ്‌സ്. ഇഷാൻ കിഷനും പിന്നിലല്ലാതെ 25 പന്തിൽ 54 റൺസ് നേടി. നാല് ഫോറുകളും നാല് സിക്സറുകളും അദ്ദേഹത്തിന്റെ ഇന്നിങ്സിൽ ഉൾപ്പെട്ടു. അവസാന ഘട്ടത്തിൽ എത്തിയ ശിവം ദുബെയും വേഗത്തിൽ റൺസ് കൂട്ടി ഇന്ത്യയുടെ സ്കോർ ഉയർത്താൻ സഹായിച്ചു.

256 റൺസ് വിജയലക്ഷ്യം പിന്തുടർന്ന ന്യൂസിലൻഡിന് തുടക്കത്തിൽ തന്നെ തിരിച്ചടികൾ നേരിടേണ്ടിവന്നു. ഇന്ത്യൻ ബൗളർമാർ നിയന്ത്രിത പ്രകടനം കാഴ്ചവെച്ചതോടെ ന്യൂസിലൻഡ് ബാറ്റിംഗ് നിര തകർന്നു.

നാല് ഓവറിൽ നാല് വിക്കറ്റ് വീഴ്ത്തിയ ജസ്പ്രീത് ബുംറയാണ് ഇന്ത്യൻ ബൗളിംഗിലെ നായകൻ. മൂന്ന് ഓവറിൽ മൂന്ന് വിക്കറ്റ് വീഴ്ത്തിയ അക്സർ പട്ടേലും മികച്ച പിന്തുണ നൽകി. ഹാർദിക് പാണ്ഡ്യ, വരുൺ ചക്രവർത്തി, അഭിഷേക് ശർമ്മ എന്നിവർ ഓരോ വിക്കറ്റ് വീതം നേടി.

ന്യൂസിലൻഡിനായി ടിം സീഫെർട്ട് മാത്രമാണ് പ്രതിരോധം തീർക്കാൻ ശ്രമിച്ചത്. 26 പന്തിൽ രണ്ട് ഫോറുകളും അഞ്ച് സിക്സറുകളും ഉൾപ്പെടെ 52 റൺസ് നേടിയെങ്കിലും അത് ടീമിനെ രക്ഷിക്കാൻ പോരാതെ പോയി. ക്യാപ്റ്റൻ മിച്ചൽ സാന്റ്നർ 43 റൺസ് നേടിയെങ്കിലും ഇന്ത്യൻ ബൗളിംഗിന് മുന്നിൽ മറ്റു ബാറ്റ്സ്മാൻമാർക്ക് നിലനിൽക്കാനായില്ല.

അവസാനം 19 ഓവറിൽ 159 റൺസിന് ന്യൂസിലൻഡിന്റെ ഇന്നിങ്‌സ് അവസാനിച്ചു. ഇതോടെ ഇന്ത്യയ്ക്ക് 96 റൺസിന്റെ വമ്പൻ വിജയം സ്വന്തമായി.

ഈ വിജയത്തോടെ ടി20 ലോകകപ്പ് ചരിത്രത്തിൽ മൂന്ന് തവണ കിരീടം നേടുന്ന ആദ്യ ടീമായി ഇന്ത്യ മാറി. കൂടാതെ തുടർച്ചയായി രണ്ടുതവണ കിരീടം നേടുന്ന ആദ്യ ടീമായും ഇന്ത്യ ചരിത്രം സൃഷ്ടിച്ചു. സ്വന്തം നാട്ടിൽ ടി20 ലോകകപ്പ് കിരീടം നേടുന്ന ആദ്യ ടീമെന്ന നേട്ടവും ഇന്ത്യ സ്വന്തമാക്കി.