തിരുവനന്തപുരം: സംസ്ഥാനത്തെ സ്വർണവില വീണ്ടും ഉയർന്നതോടെ ഉപഭോക്താക്കൾ ആശങ്കയിലായിരിക്കുകയാണ്. തുടർച്ചയായ വർധനവിൽ കഴിഞ്ഞ എട്ട് ദിവസത്തിനിടെ 2,600 രൂപയുടെ വർദ്ധനയാണ് രേഖപ്പെടുത്തിയിരിക്കുന്നത്. ഇന്നലെ മാത്രം 680 രൂപ വർദ്ധിച്ച സ്വർണവിലയിൽ ഇന്ന് മാറ്റമില്ല.

വിപണിയിൽ ഒരു പവൻ 22 കാരറ്റ് സ്വർണത്തിന് 68,080 രൂപയാണ് നിലവിലെ നിരക്ക്. അതേസമയം, ഒരു ഗ്രാം 22 കാരറ്റ് സ്വർണത്തിന് 8,510 രൂപയും 18 കാരറ്റിന് 6,980 രൂപയുമാണ്. വെള്ളിയുടെ വിലയും വർദ്ധിച്ചിരിക്കുകയാണ്; ഒരു ഗ്രാം സാധാരണ വെള്ളിക്ക് 112 രൂപയാണ് ഇപ്പോഴത്തെ നിരക്ക്.

സ്വർണവിലയിലുണ്ടാകുന്ന കുതിപ്പിന് അന്താരാഷ്ട്ര വിപണിയിലെ അനിശ്ചിതത്വവും  പ്രധാന കാരണം  ആകുന്നു . പ്രത്യേകിച്ച്, യുഎസ് മുൻ പ്രസിഡൻ്റ് ഡൊണാൾഡ് ട്രംപിന്റെ അപ്രതീക്ഷ പ്രഖ്യാപനങ്ങൾ സ്വർണവിലയെ കൂടുതൽ സ്വാധീനിക്കാനിടയുണ്ട്. ഏപ്രിൽ 2 മുതൽ പുതിയ താരിഫുകൾ പ്രാബല്യത്തിൽ വന്നാൽ സ്വർണവില ഇനിയും ഉയരാൻ സാധ്യതയുണ്ടെന്ന് സാമ്പത്തിക വിദഗ്ധർ വിലയിരുത്തുന്നു. അതേസമയം, ട്രംപിന്റെ നയങ്ങളിൽ ഇളവുകൾ വന്നാൽ വിലയിലൊരു സ്ഥിരത പ്രതീക്ഷിക്കാം.

ഏപ്രിലിലെ സ്വർണവില – പ്രധാന വിവരങ്ങൾ

• ഏപ്രിൽ 1: സ്വർണത്തിന് 680 രൂപ വർദ്ധിച്ച് പവന് 68,080 രൂപ.
• ഏപ്രിൽ 2: വിലയിൽ മാറ്റമില്ല, 68,080 രൂപ തന്നെ.

2025 ജനുവരിയിൽ 22 കാരറ്റ് ഒരു ഗ്രാം സ്വർണത്തിന് 7,150 രൂപയും ഒരു പവന് 57,200 രൂപയുമായിരുന്നു. മൂന്നു മാസത്തിനിടെ ഗ്രാമിന് 1,360 രൂപയും പവന് 10,880 രൂപയുമാണ് കൂടിയത്.

സ്വർണത്തിൽ നിക്ഷേപമിട്ടവർക്കു ഈ വിലക്കയറ്റം ഗുണകരമാണെങ്കിലും ആഭരണ ഉപഭോക്താക്കൾക്ക് ഇത് വലിയൊരു തിരിച്ചടിയായി മാറുകയാണ്. വരും ദിവസങ്ങളിലും വില ഉയരാൻ സാധ്യതയുള്ളതിനാൽ, ഉപഭോക്താക്കൾ ഏറെ ആശങ്കയിലാണ്.