ന്യൂഡൽഹി: ഫുട്‍ബോൾ ആരാധകർക്ക് ആവേശം പകർന്ന്, അർജന്റീനയുടെ സൂപ്പർതാരം ലയണൽ മെസി ഒക്ടോബറിൽ ഇന്ത്യയിലെത്തുമെന്ന റിപ്പോർട്ടുകൾ പുറത്തുവരുന്നു. മെസിയെയും അർജന്റീന ദേശീയ ടീമിനെയും കാണാനുള്ള അഭിമാന നിമിഷം കേരളക്കരയ്ക്കാകുമോ ?

14 വർഷങ്ങൾക്ക് ശേഷമാണ് ലയണൽ മെസി വീണ്ടും ഇന്ത്യ സന്ദർശിക്കുന്നത്. എച്ച്എസ്ബിസി ഇന്ത്യ, അർജന്റീന ഫുട്ബോൾ അസോസിയേഷന്റെ ഔദ്യോഗിക പങ്കാളിയായി മാറിയതിന് പിന്നാലെയാണ് മെസി ഉൾപ്പെടെയുള്ള അർജന്റീന ടീമിന്റെ ഇന്ത്യയിലെത്തലുമായി ബന്ധപ്പെട്ട വാർത്തകൾ വീണ്ടും മുന്നിലെത്തിയത്.

ഒക്ടോബറിലെ മത്സരത്തിനായി കേരളം വേദിയാകുമോ?

എച്ച്എസ്ബിസി ഇന്ത്യ പുറത്തിറക്കിയ ഔദ്യോഗിക പ്രസ്താവനയിൽ, 2025 ഒക്ടോബറിലെ ഒരു അന്താരാഷ്ട്ര പ്രദർശന മത്സരത്തിനായി അർജന്റീന ദേശീയ ടീം ഇന്ത്യ സന്ദർശിക്കുമെന്ന് വ്യക്തമാക്കിയിട്ടുണ്ട്. എന്നാൽ മത്സരം ഏതൊരിടത്താകും എന്നത് സംബന്ധിച്ച് കൃത്യമായ ഉറപ്പില്ല. എന്നിരുന്നാലും, കേരളത്തിൽ വച്ചായിരിക്കും ഈ ചരിത്ര മത്സരത്തിന് വേദിയാവുക എന്ന സൂചനകളാണ് പുറത്തുവരുന്നത്.

കഴിഞ്ഞ വർഷം നവംബറിൽ, കേരള കായിക മന്ത്രി വി. അബ്‌ദുറഹ്മാൻ അർജന്റീന ടീമിനെ സംസ്ഥാനത്ത് സ്വാഗതം ചെയ്ത്, കൊച്ചിയിൽ രണ്ടു സൗഹൃദ മത്സരങ്ങൾ നടത്തുമെന്ന് അറിയിച്ചിരുന്നു. ഒക്ടോബറിലാണ് ഇവ നടക്കാനിടയുള്ളതെന്നും അന്ന് മന്ത്രി വ്യക്തമാക്കിയിരുന്നു.

2026 ലോകകപ്പ് യോഗ്യതാ മത്സരങ്ങൾക്ക് മുന്നോടിയായി, 2025-ലെ മത്സര സീസൺ ഉൾപ്പെടുത്തി ഇന്ത്യയും സിംഗപ്പൂറും അർജന്റീന ഫുട്ബോൾ അസോസിയേഷനുമായി പുതിയ ഒരു വർഷത്തെ പങ്കാളിത്തം ഒപ്പുവെച്ചതായും ഇന്ന് ഔദ്യോഗികമായി സ്ഥിരീകരിച്ചിട്ടുണ്ട്.

ഇത് അർജന്റീന ആരാധകരുടെയും ഇന്ത്യൻ ഫുട്‍ബോൾ പ്രേമികളുടെ ദിനങ്ങളാകുമോ? ഔദ്യോഗിക പ്രഖ്യാപനത്തിനായി കാത്തിരിക്കാം!