കോഴിക്കോട് ജില്ലയിൽ നിപ വൈറസ് ബാധ സ്ഥിരീകരിച്ചതിനെ തുടർന്ന് കേന്ദ്ര ആരോഗ്യ ഏജൻസികളുടെ വിദഗ്ധ സംഘം കോഴിക്കോട്ടെത്തി. നാഷണൽ ഇൻസ്റ്റിറ്റ്യൂട്ട് ഓഫ് വൈറോളജി (NIV), ഇന്ത്യൻ കൗൺസിൽ ഓഫ് മെഡിക്കൽ റിസർച്ച് (ICMR) എന്നിവയുടെ പ്രതിനിധികളാണ് സ്ഥിതിഗതികൾ വിലയിരുത്തുന്നതിനായി എത്തിയത്.

ജില്ലയിലെ ആരോഗ്യ വകുപ്പ് ഉദ്യോഗസ്ഥരുമായി സംഘം ചർച്ച നടത്തുകയും നിപ പ്രതിരോധ പ്രവർത്തനങ്ങളുടെ പുരോഗതി വിലയിരുത്തുകയും ചെയ്യും. നിപ അവലോകന യോഗത്തിലും കേന്ദ്ര സംഘം പങ്കെടുക്കും. രോഗവ്യാപനം തടയുന്നതിനുള്ള നടപടികൾ കൂടുതൽ ശക്തമാക്കുന്നതിന്റെ ഭാഗമായാണ് കേന്ദ്ര ഇടപെടൽ.

അതേസമയം, രോഗിയുമായി സമ്പർക്കത്തിൽ വന്നതായി കണ്ടെത്തിയ മൂന്ന് പേരുടെ സ്രവ പരിശോധനാഫലം നെഗറ്റീവായി. ഇവരെ മുൻകരുതൽ നടപടിയുടെ ഭാഗമായി ആശുപത്രിയിലേക്ക് മാറ്റിയിരുന്നു. കോഴിക്കോട് മെഡിക്കൽ കോളേജിൽ നടത്തിയ പരിശോധനയിലാണ് വൈറസ് ബാധയില്ലെന്ന് സ്ഥിരീകരിച്ചത്.

സംസ്ഥാന ആരോഗ്യ മന്ത്രി നാളെ കോഴിക്കോട് ക്യാമ്പ് ചെയ്ത് പ്രതിരോധ പ്രവർത്തനങ്ങൾ നേരിട്ട് ഏകോപിപ്പിക്കുമെന്നും അധികൃതർ അറിയിച്ചു. സമ്പർക്കപ്പട്ടികയിലുള്ളവരെ നിരീക്ഷിക്കുകയും ആവശ്യമായ ആരോഗ്യ നടപടികൾ തുടരുകയും ചെയ്യുന്നുണ്ട്.