ചെന്നൈ: തമിഴ് ചലച്ചിത്രലോകത്തെ പുതിയ വഴികളിലേക്ക് നയിച്ച പ്രശസ്ത സംവിധായകൻ പി. ഭാരതിരാജ അന്തരിച്ചു. വാർധക്യസഹജമായ ആരോഗ്യപ്രശ്നങ്ങളെ തുടർന്ന് ചെന്നൈയിലെ സ്വകാര്യ ആശുപത്രിയിലായിരുന്നു അന്ത്യം. 84 വയസ്സായിരുന്നു.

തമിഴ് സിനിമയെ സ്റ്റുഡിയോ സെറ്റുകളുടെ പരിമിതികളിൽ നിന്ന് ഗ്രാമീണ ജീവിതത്തിന്റെ യാഥാർഥ്യങ്ങളിലേക്ക് എത്തിച്ച സംവിധായകനെന്ന നിലയിലാണ് ഭാരതിരാജയെ സിനിമാപ്രേമികൾ ഓർക്കുന്നത്. ഗ്രാമങ്ങളുടെ സൗന്ദര്യവും മനുഷ്യബന്ധങ്ങളും സാമൂഹിക യാഥാർഥ്യങ്ങളും സിനിമയിൽ ശക്തമായി അവതരിപ്പിച്ച അദ്ദേഹത്തിന് തമിഴ് സിനിമയിൽ പ്രത്യേക സ്ഥാനമുണ്ട്.

1941 ജൂലൈ 17-ന് തമിഴ്നാട്ടിലെ തേനിക്കടുത്തുള്ള അല്ലിനഗരത്തിലാണ് ചിന്നസാമിയായി ജനനം. പിന്നീട് സിനിമാരംഗത്ത് പി. ഭാരതിരാജ എന്ന പേരിൽ പ്രശസ്തനായി. നാടകങ്ങളോടുള്ള താൽപര്യമാണ് അദ്ദേഹത്തെ സിനിമയിലേക്ക് എത്തിച്ചത്. സംവിധായകൻ പുട്ടണ്ണ കനഗലിന്റെ സഹായി ആയാണ് സിനിമാജീവിതത്തിന് തുടക്കമിട്ടത്.

1977-ൽ പുറത്തിറങ്ങിയ ‘16 വയതിനിലേ’ (16 Vayathinile) എന്ന ചിത്രത്തിലൂടെയാണ് അദ്ദേഹം സംവിധായകനായി അരങ്ങേറ്റം കുറിച്ചത്. കമൽഹാസൻ, രജനീകാന്ത്, ശ്രീദേവി എന്നിവർ അഭിനയിച്ച ചിത്രം തമിഴ് സിനിമയിൽ പുതിയൊരു ദൃശ്യഭാഷയ്ക്ക് തുടക്കമിട്ടു. തുടർന്ന് നിരവധി ശ്രദ്ധേയ ചിത്രങ്ങൾ ഒരുക്കിയ ഭാരതിരാജ, സംവിധായകനെന്നതിലുപരി തിരക്കഥാകൃത്ത്, നിർമ്മാതാവ്, നടൻ എന്നീ നിലകളിലും ശ്രദ്ധ നേടി.

അടുത്തകാലത്ത് ആരോഗ്യനില മോശമായിരുന്ന അദ്ദേഹം മകൻ മനോജിന്റെ വേർപാടിനെ തുടർന്ന് മാനസികമായി ഏറെ തളർന്നിരുന്നുവെന്നാണ് അടുത്തവൃത്തങ്ങൾ പറയുന്നത്. ഭാരതിരാജയുടെ വിയോഗം തമിഴ് സിനിമയ്ക്ക് നികത്താനാകാത്ത നഷ്ടമാണെന്ന് സിനിമാ ലോകം അനുശോചിച്ചു.