തിരുവനന്തപുരം: സംസ്ഥാനത്ത് വാർഷിക ട്രോളിംഗ് നിരോധനം ഇന്ന് മുതൽ പ്രാബല്യത്തിൽ വന്നു. മത്സ്യസമ്പത്ത് സംരക്ഷിക്കുകയും മത്സ്യങ്ങളുടെ പ്രജനനകാലത്ത് അവയ്ക്ക് സുരക്ഷ ഉറപ്പാക്കുകയും ചെയ്യുന്നതിന്റെ ഭാഗമായാണ് 52 ദിവസത്തെ നിരോധനം നടപ്പാക്കുന്നത്. ജൂലൈ 31 വരെയാണ് ട്രോളിംഗ് നിരോധനം തുടരണം.

നിരോധന കാലയളവിൽ കേരള തീരത്ത് കരയിൽ നിന്ന് 12 നോട്ടിക്കൽ മൈൽ പരിധിക്കുള്ളിൽ യന്ത്രവത്കൃത ട്രോളറുകൾക്ക് മത്സ്യബന്ധനം നടത്താൻ അനുമതിയുണ്ടാകില്ല. എന്നാൽ പരമ്പരാഗത മത്സ്യബന്ധന വള്ളങ്ങൾക്കും ചെറിയ ബോട്ടുകൾക്കും നിയന്ത്രണങ്ങളിൽ നിന്ന് ഇളവ് നൽകിയിട്ടുണ്ട്.

ട്രോളിംഗ് നിരോധനത്തിന്റെ ഭാഗമായി നീണ്ടകര, തങ്കശ്ശേരി, അഴീക്കൽ ഹാർബർ ഉൾപ്പെടെയുള്ള മേഖലകളിൽ യന്ത്രമത്സ്യബന്ധന ബോട്ടുകളുടെ സഞ്ചാരത്തിനും നങ്കൂരമിടുന്നതിനും വിലക്കേർപ്പെടുത്തിയിട്ടുണ്ട്. കൂടാതെ, നിയമലംഘനം തടയുന്നതിനായി ചില മേഖലകളിലെ മറൈൻ ഇന്ധന പമ്പുകളും താൽക്കാലികമായി അടച്ചിടും.

മറ്റ് സംസ്ഥാനങ്ങളിൽ നിന്നുള്ള മത്സ്യബന്ധന ബോട്ടുകൾ നിരോധനം ആരംഭിക്കുന്നതിന് മുമ്പ് കേരള തീരം വിട്ടുപോകണമെന്ന് അധികൃതർ നിർദേശിച്ചിട്ടുണ്ട്. ട്രോളിംഗ് നിരോധനം കർശനമായി നടപ്പാക്കാൻ മത്സ്യബന്ധന വകുപ്പ്, കോസ്റ്റൽ പൊലീസ്, മറൈൻ എൻഫോഴ്‌സ്‌മെന്റ് വിഭാഗങ്ങൾ എന്നിവ സംയുക്ത പരിശോധനകളും നിരീക്ഷണവും ശക്തമാക്കിയിട്ടുണ്ട്.

അതേസമയം, കാലവർഷം ശക്തമായ സാഹചര്യവും കടലിൽ തുടരുന്ന മോശം കാലാവസ്ഥയും മത്സ്യത്തൊഴിലാളികളെ പ്രതിസന്ധിയിലാക്കിയിരിക്കുകയാണ്. ട്രോളിംഗ് നിരോധനം കൂടി വന്നതോടെ വരുമാന നഷ്ടം വർധിക്കുമെന്ന ആശങ്കയാണ് മത്സ്യത്തൊഴിലാളികൾ പങ്കുവയ്ക്കുന്നത്.

നിരോധന കാലയളവിൽ നിയമലംഘനം നടത്തുന്ന ബോട്ടുകൾക്കെതിരെ കർശന നടപടികൾ സ്വീകരിക്കുമെന്ന് ജില്ലാ ഭരണകൂടം മുന്നറിയിപ്പ് നൽകി.