ദുബായ്: യുഎഇയിലെ പൊതുമേഖലയിലെയും സ്വകാര്യമേഖലയിലെയും ജീവനക്കാർക്ക് ആശ്വാസവാർത്തയായി ഹിജ്റ പുതുവർഷ അവധി പ്രഖ്യാപിച്ചു. ഹിജ്റ പുതുവർഷത്തോടനുബന്ധിച്ച് ജൂൺ 15 തിങ്കളാഴ്ച രാജ്യത്ത് പൊതുഅവധി ആയിരിക്കുമെന്ന് ഫെഡറൽ അതോറിറ്റി ഫോർ ഗവൺമെന്റ് ഹ്യൂമൻ റിസോഴ്‌സസ് ഔദ്യോഗികമായി അറിയിച്ചു.

തിങ്കളാഴ്ച അവധി ലഭിക്കുന്നതോടെ ജീവനക്കാർക്ക് തുടർച്ചയായി മൂന്ന് ദിവസത്തെ നീണ്ട വാരാന്ത്യം ആസ്വദിക്കാനാകും. ശനി, ഞായർ ദിവസങ്ങളിലെ പതിവ് വാരാന്ത്യ അവധിക്ക് പിന്നാലെയാണ് തിങ്കളാഴ്ചത്തെ പൊതുഅവധി വരുന്നത്.

ഇതോടെ ജൂൺ 13 ശനിയാഴ്ച മുതൽ ജൂൺ 15 തിങ്കളാഴ്ച വരെ ജീവനക്കാർക്ക് അവധി ലഭിക്കും. അവധിക്ക് ശേഷം ജൂൺ 16 ചൊവ്വാഴ്ച മുതൽ സർക്കാർ ഓഫീസുകളും സ്വകാര്യ സ്ഥാപനങ്ങളും സാധാരണ രീതിയിൽ പ്രവർത്തനം പുനരാരംഭിക്കും.

പൊതുമേഖലയിലെയും സ്വകാര്യമേഖലയിലെയും മുഴുവൻ ജീവനക്കാർക്കും ഈ അവധി ബാധകമാണെന്ന് അധികൃതർ വ്യക്തമാക്കി. ഹിജ്റ പുതുവർഷ അവധി പ്രഖ്യാപനം പ്രവാസികൾ ഉൾപ്പെടെയുള്ള ലക്ഷക്കണക്കിന് തൊഴിലാളികൾക്ക് യാത്രകളും കുടുംബസംഗമങ്ങളും ആസൂത്രണം ചെയ്യാൻ അവസരമൊരുക്കും.