തിരുവനന്തപുരം: ഇന്ധനവിലയിലെ തുടർച്ചയായ വർധനവും സാമ്പത്തിക പ്രതിസന്ധിയും ചൂണ്ടിക്കാട്ടി ജൂൺ 15 മുതൽ സ്വകാര്യ ബസ് സർവീസുകൾ നിർത്തിവെക്കേണ്ട സാഹചര്യമുണ്ടാകുമെന്ന് സ്വകാര്യ ബസ് ഓപ്പറേറ്റേഴ്‌സ് ഫെഡറേഷൻ സംസ്ഥാന സെക്രട്ടറി ഹംസ മുന്നറിയിപ്പ് നൽകി. ഡീസൽ വില രണ്ടാഴ്ചയ്ക്കിടെ എട്ട് രൂപയോളം വർധിച്ച സാഹചര്യത്തിൽ സർക്കാർ അടിയന്തര ഇടപെടൽ നടത്തണമെന്നും അദ്ദേഹം ആവശ്യപ്പെട്ടു.

ഇന്ധനത്തിന് സബ്സിഡി അനുവദിക്കണമെന്നും സ്വകാര്യ ബസുകൾക്ക് റോഡ് ടാക്സിൽ ഇളവ് നൽകണമെന്നും ഫെഡറേഷൻ ആവശ്യപ്പെടുന്നു. നിലവിൽ സ്വകാര്യ ബസുകളുടെ വരുമാനത്തിന്റെ വലിയൊരു പങ്ക് ഡീസൽ ചെലവിലേക്കാണ് പോകുന്നതെന്നും ഈ സാഹചര്യത്തിൽ സർവീസ് തുടരുന്നത് ദുഷ്‌കരമാണെന്നും ഹംസ പറഞ്ഞു.

കെഎസ്ആർടിസിയിൽ സ്ത്രീകൾക്ക് സൗജന്യ യാത്രാ പദ്ധതി നടപ്പാക്കുമ്പോൾ സ്വകാര്യ ബസ് മേഖലയെയും പരിഗണിക്കണമെന്ന് ഫെഡറേഷൻ ആവശ്യപ്പെട്ടു. സ്വകാര്യ ബസുകളിലെ യാത്രക്കാരിൽ പകുതിയിലധികവും സ്ത്രീകളാണെന്നും സൗജന്യ യാത്ര നടപ്പായാൽ വരുമാനത്തിൽ വലിയ കുറവ് സംഭവിക്കുമെന്നും അദ്ദേഹം ചൂണ്ടിക്കാട്ടി.

സ്വകാര്യ ബസുകൾക്ക് കിലോമീറ്ററിന് നിശ്ചിത തുക നൽകി സർക്കാർ ഏറ്റെടുത്ത് നടത്തുന്നതും പരിഗണിക്കാവുന്ന മാർഗമാണെന്ന് ഫെഡറേഷൻ അഭിപ്രായപ്പെട്ടു. വനിതകൾക്ക് സൗജന്യ യാത്ര നൽകുന്നതിനെ എതിർക്കുന്നില്ലെങ്കിലും പൊതുമേഖലയെയും സ്വകാര്യ മേഖലയെയും ഒരുപോലെ പരിഗണിക്കുന്ന ഗതാഗത നയം രൂപീകരിക്കണമെന്ന് സംഘടന ആവശ്യപ്പെട്ടു.

മുഖ്യമന്ത്രിക്കും ഗതാഗത മന്ത്രിക്കും വിഷയത്തിൽ നിവേദനം നൽകിയിട്ടുണ്ടെന്നും സർക്കാർ അനുകൂല നിലപാട് സ്വീകരിച്ചില്ലെങ്കിൽ സമര നടപടികളിലേക്ക് നീങ്ങേണ്ടിവരുമെന്നും ഫെഡറേഷൻ അറിയിച്ചു.