ആഗോളതലത്തിൽ തുടരുന്ന ഭൗമരാഷ്ട്രീയ സംഘർഷങ്ങളും വിമാന ഇന്ധന ഉൽപാദനത്തിലെ കുറവും വ്യോമയാന മേഖലയെ പ്രതിസന്ധിയിലാക്കുന്നതായി റിപ്പോർട്ട്. പ്രമുഖ കൺസൾട്ടിങ് സ്ഥാപനമായ മക്കിൻസി പുറത്തുവിട്ട പഠന റിപ്പോർട്ട് പ്രകാരം, വിമാന ഇന്ധനത്തിന്റെ ലഭ്യത കുറഞ്ഞതോടെ എയർലൈൻ കമ്പനികളുടെ പ്രവർത്തനച്ചെലവ് ഉയരുകയാണ്. ഇതിന്റെ പ്രതിഫലനമായി വരും മാസങ്ങളിൽ വിമാന ടിക്കറ്റ് നിരക്കുകൾ ഗണ്യമായി വർധിക്കാനിടയുണ്ടെന്നാണ് വിലയിരുത്തൽ.

വേനൽക്കാല യാത്രകൾ വർധിക്കുന്ന സാഹചര്യത്തിൽ വിമാന ഇന്ധനത്തിനുള്ള ആവശ്യകത ഉയരുന്നുണ്ടെങ്കിലും ലഭ്യത അതിന് അനുസൃതമല്ല. ക്രൂഡ് ഓയിൽ വിലയിലെ മാറ്റങ്ങളും പ്രധാന ഉൽപാദന കേന്ദ്രങ്ങളിലെ റിഫൈനറികളുടെ പ്രവർത്തനക്ഷമത കുറഞ്ഞതുമാണ് നിലവിലെ പ്രതിസന്ധിക്ക് പ്രധാന കാരണങ്ങൾ.

ലോകത്തെ വിമാന ഇന്ധന വിതരണത്തിന്റെ വലിയൊരു പങ്ക് വഹിക്കുന്ന ഗൾഫ്, ഏഷ്യൻ മേഖലകളിലെ റിഫൈനറികളിൽ ഉൽപാദനം കുറഞ്ഞത് വിപണിയെ ബാധിച്ചിട്ടുണ്ട്. വിമാന ടിക്കറ്റ് നിരക്കിലെ ഏകദേശം 30 ശതമാനം വരെ ഇന്ധനച്ചെലവാണുള്ളത്. അതിനാൽ ഇന്ധനവില ഉയരുന്ന സാഹചര്യത്തിൽ ടിക്കറ്റ് നിരക്കിൽ 20 മുതൽ 25 ശതമാനം വരെ വർധന രേഖപ്പെടുത്താൻ സാധ്യതയുണ്ടെന്നാണ് റിപ്പോർട്ടിൽ പറയുന്നത്.

അതേസമയം, ക്രൂഡ് ഓയിലും വിമാന ഇന്ധനവും തമ്മിലുള്ള വിലവ്യത്യാസം സൂചിപ്പിക്കുന്ന ‘ക്രാക്ക് സ്പ്രെഡ്’ നിരക്കും ഉയർന്ന നിലയിലാണ്. ആഗോള വിതരണ ശൃംഖല പൂർണമായും സാധാരണ നിലയിലാകുന്നതുവരെ ഇന്ധനവിലയിൽ കാര്യമായ കുറവ് പ്രതീക്ഷിക്കാനാകില്ലെന്നാണ് വിദഗ്ധരുടെ വിലയിരുത്തൽ.