അരുണാചൽ പ്രദേശിൽ കഴിഞ്ഞ ദിവസങ്ങളിലുണ്ടായ അതിശക്തമായ മഴയെ തുടർന്ന് മിന്നൽ പ്രളയവും മണ്ണിടിച്ചിലും വ്യാപക നാശനഷ്ടങ്ങൾക്ക് ഇടയാക്കി. ലോവർ സുബാൻസിരി, കെയ് പന്യോർ ജില്ലകളിലാണ് ഏറ്റവും കൂടുതൽ ആഘാതം റിപ്പോർട്ട് ചെയ്തിരിക്കുന്നത്. യാസാലിയിലെ നീപ്കോ കോളനി പ്രദേശത്ത് ഏകദേശം 15 വീടുകൾ തകർന്നതായി അധികൃതർ അറിയിച്ചു.

കനത്ത മഴയെ തുടർന്നുണ്ടായ വെള്ളപ്പൊക്കത്തിൽ ദേശീയപാതയിലെ ഒരു പ്രധാന പാലം ഒലിച്ചുപോയതോടെ ഗതാഗതം പൂർണമായും തടസ്സപ്പെട്ടു. അപകടത്തിൽ ആളപായമൊന്നും റിപ്പോർട്ട് ചെയ്തിട്ടില്ലെങ്കിലും നിരവധി കുടുംബങ്ങളെ സുരക്ഷിത കേന്ദ്രങ്ങളിലേക്ക് മാറ്റിപ്പാർപ്പിച്ചു.

പൂസ മേഖലയിലെ നോർത്ത് ഈസ്റ്റേൺ ഇലക്ട്രിക് പവർ കോർപ്പറേഷൻ (NEEPCO) പദ്ധതിപ്രദേശത്തിന് ചുറ്റുമുള്ള മേഖലകളിൽ നിരവധി മണ്ണിടിച്ചിലുകൾ ഉണ്ടായതോടെ പ്രദേശം ഒറ്റപ്പെട്ടു. പദ്ധതിയുടെ ഹെലിപാഡിനും കേടുപാടുകൾ സംഭവിച്ചിട്ടുണ്ടെന്നും റോഡ് ബന്ധം വിച്ഛേദിക്കപ്പെട്ടതായും റിപ്പോർട്ടുകളുണ്ട്.

സുരക്ഷാ മുൻകരുതലിന്റെ ഭാഗമായി നീപ്കോ തങ്ങളുടെ പവർഹൗസ് താൽക്കാലികമായി പ്രവർത്തനം നിർത്തിവെച്ചിട്ടുണ്ട്. അണക്കെട്ടിൽ നിന്നുള്ള ജലവിതരണം നിയന്ത്രിത രീതിയിലാണ് നടത്തുന്നത്. പ്രദേശത്ത് രക്ഷാപ്രവർത്തനങ്ങൾ തുടരുകയാണെന്നും വരും ദിവസങ്ങളിലും ശക്തമായ മഴയ്ക്ക് സാധ്യതയുണ്ടെന്നുമാണ് കാലാവസ്ഥാ വകുപ്പിന്റെ മുന്നറിയിപ്പ്.