കൊച്ചി: ക്രിസ്മസ്–പുതുവത്സര കാലം അടുത്തതോടെ ഫോർട്ട് കൊച്ചിയിൽ ആഘോഷങ്ങളുടെ ആവേശം നിറയുകയാണ്. നക്ഷത്രങ്ങളും ദീപാലങ്കാരങ്ങളും ഇല്ലാത്ത വഴികൾ വിരളമായ ഈ പ്രദേശം, ഓരോ വർഷവും രാജ്യത്തിനകത്തും പുറത്തുമുള്ള ആയിരങ്ങളെ ആകർഷിക്കുന്ന ആഘോഷകേന്ദ്രമാണ്. ഈ ആഘോഷങ്ങളുടെ മുഖ്യ ആകർഷണമായി മാറിയിരിക്കുന്നതാണ് വെളി മൈതാനത്തിലെ പ്രശസ്തമായ മഴമരം.

ഈ വർഷവും മഴമരം ക്രിസ്മസ്–പുതുവത്സര ആഘോഷങ്ങളുടെ സ്റ്റാർ ആകാൻ ഒരുങ്ങുകയാണ്. യുവാക്കളുടെ കൂട്ടായ്മയായ നൈറ്റ് യുണൈറ്റഡ് തുടർച്ചയായ 26-ാം വർഷമാണ് അലങ്കാര പ്രവർത്തനങ്ങൾക്ക് നേതൃത്വം നൽകുന്നത്. കഴിഞ്ഞ ഒരു മാസത്തിലേറെയായി അലങ്കാര ജോലികൾ പുരോഗമിക്കുകയാണ്.

ഇത്തവണ മഴമരത്തിന് വേണ്ടി ഉപയോഗിക്കുന്നത് ഒന്നര ലക്ഷം സീരിയൽ ബൾബുകളാണ്. ഇതോടൊപ്പം 100 എൽഇഡി നക്ഷത്രങ്ങൾ, 100 മണികൾ, 50 എൽഇഡി ബോളുകൾ എന്നിവയും അലങ്കാരത്തിന്റെ ഭാഗമാകും. മരത്തിന്റെ ചുവട്ടിലെ തടിയിൽ 150 എൽഇഡി നാടകളും പ്രത്യേകമായി സ്ഥാപിച്ചിട്ടുണ്ട്. മഴമരത്തിന് സമീപമുള്ള റോഡിൽ 350 മീറ്റർ നീളത്തിൽ തോരണങ്ങളും 100 നക്ഷത്രങ്ങളും ഉപയോഗിച്ച് വിപുലമായ അലങ്കാരമാണ് ഒരുക്കിയിരിക്കുന്നത്.

മരത്തിന്റെ മുകളിലായി സ്ഥാപിച്ച 10 അടി ഉയരമുള്ള ഭീമൻ നക്ഷത്രം ഇന്ന് വൈകുന്നേരം തെളിയിക്കും. ഇതിന് പിന്നാലെ സാവിയോയുടെ ഡിജെ പരിപാടിയും നടക്കും. മഴമരത്തിലെ ലൈറ്റുകളുടെ ഔദ്യോഗിക സ്വിച്ച് ഓൺ കർമം ഡിസംബർ 25-ന് വൈകിട്ട് 7 മണിക്ക് നടക്കും.

ഓരോ വർഷവും പോലെ ഇത്തവണയും മഴമരം ഏത് നിറത്തിലാണ് തെളിയുക എന്നതാണ് ഏറ്റവും വലിയ കൗതുകം. ഇതിനകം തന്നെ സോഷ്യൽ മീഡിയയിലും നാട്ടുകാരുടെ ഇടയിലും നിറത്തെക്കുറിച്ചുള്ള പ്രവചനങ്ങളും പന്തയങ്ങളും സജീവമാണ്. ക്രിസ്മസ് രാത്രികളിൽ ഫോർട്ട് കൊച്ചിയെ ഒരു വർണലോകമാക്കി മാറ്റുന്ന മഴമരം, ഈ വർഷവും ആഘോഷങ്ങളുടെ ഹൃദയമാകുമെന്ന് ഉറപ്പാണ്.