വിവാദങ്ങൾക്കൊടുവിൽ കേരള സ്റ്റോറി 2 തിയേറ്റർ റിലീസിനായി വീണ്ടും പാത തെളിഞ്ഞു. സിനിമയുടെ പ്രദർശനത്തിന് സിംഗിൾ ബെഞ്ച് ഏർപ്പെടുത്തിയിരുന്ന ഇടക്കാല സ്റ്റേ ഹൈക്കോടതി ഡിവിഷൻ ബെഞ്ച് റദ്ദാക്കി. ജസ്റ്റിസ് ശുശ്രൂദ് ധർമ്മധികാരി അധ്യക്ഷനായ ബെഞ്ചാണ് നിർണായകമായ ഈ ഉത്തരവ് പുറപ്പെടുവിച്ചത്.

ചിത്രത്തിന്റെ റിലീസ് തടയണമെന്നാവശ്യപ്പെട്ടുള്ള സിംഗിൾ ബെഞ്ച് ഉത്തരവിനെതിരെ നിർമ്മാതാക്കൾ നൽകിയ അപ്പീലിലാണ് ഡിവിഷൻ ബെഞ്ചിന്റെ ഇടപെടൽ. സിനിമ മതസൗഹാർദ്ദത്തെ ബാധിക്കുന്ന തരത്തിലല്ലെന്നും, റിലീസ് വൈകുന്നത് വലിയ സാമ്പത്തിക നഷ്ടത്തിന് ഇടയാക്കുമെന്നും നിർമ്മാതാക്കൾ കോടതിയെ ബോധ്യപ്പെടുത്തി.

മുമ്പ് സിംഗിൾ ബെഞ്ച് ചിത്രം മതസൗഹാർദ്ദത്തിന് ഭീഷണിയാകാമെന്ന പ്രാഥമിക നിരീക്ഷണം രേഖപ്പെടുത്തിയിരുന്നു. ഇതിന്റെ അടിസ്ഥാനത്തിൽ 15 ദിവസത്തേക്ക് റിലീസ് സ്റ്റേ ചെയ്യുകയും സെൻസർ സർട്ടിഫിക്കറ്റ് പുനഃപരിശോധിക്കണമെന്നും നിർദ്ദേശിക്കുകയും ചെയ്തിരുന്നു.

എന്നാൽ ഡിവിഷൻ ബെഞ്ച് ഈ ഉത്തരവ് സ്റ്റേ ചെയ്തതോടെ ചിത്രം വീണ്ടും റിലീസിനായി ഒരുങ്ങുകയാണ്. ചിത്രം ആഗോള തലത്തിൽ കേരളത്തെ തെറ്റായി ചിത്രീകരിക്കുമെന്ന് ഹർജിക്കാർ വാദിച്ചിരുന്നുവെങ്കിലും, നിർമ്മാതാക്കൾ നിയമാനുസൃതമായ എല്ലാ നടപടികളും പാലിച്ചാണ് സെൻസർ അനുമതി നേടിയതെന്ന് കോടതിയിൽ വ്യക്തമാക്കി.

ഇതോടെ സിനിമയുടെ റിലീസിനെ ചുറ്റിപ്പറ്റിയിരുന്ന നിയമപരമായ അനിശ്ചിതത്വം താൽക്കാലികമായി മാറി. ചിത്രത്തിന്റെ തിയേറ്റർ റിലീസ് തീയതി സംബന്ധിച്ച അന്തിമ തീരുമാനം ഉടൻ പ്രതീക്ഷിക്കപ്പെടുന്നു.