തിരുവനന്തപുരം: ഇന്ത്യൻ ചലച്ചിത്ര സംഗീത ലോകത്ത് പതിറ്റാണ്ടുകളായി തന്റേതായ വ്യക്തിമുദ്ര പതിപ്പിച്ച ഗായിക കെ എസ് ചിത്ര ഇന്ന് 63-ാം ജന്മദിനം ആഘോഷിക്കുന്നു. മധുരമാർന്ന ശബ്ദവും ഭാവസമ്പന്നമായ ആലാപനശൈലിയും കൊണ്ട് തലമുറകളുടെ ഹൃദയത്തിൽ ഇടം നേടിയ ചിത്ര ഇന്നും സംഗീതാസ്വാദകരുടെ പ്രിയഗായികയാണ്.

മലയാളം ഉൾപ്പെടെ തമിഴ്, തെലുങ്ക്, ഹിന്ദി, കന്നഡ, ഒറിയ, ബംഗാളി, അസമീസ് തുടങ്ങി നിരവധി ഇന്ത്യൻ ഭാഷകളിലായി ആയിരക്കണക്കിന് ഗാനങ്ങൾ ആലപിച്ച കെ എസ് ചിത്ര, ഇന്ത്യൻ സംഗീതരംഗത്തെ ഏറ്റവും ശ്രദ്ധേയമായ വനിതാ പിന്നണി ഗായികമാരിൽ ഒരാളായി വിലയിരുത്തപ്പെടുന്നു.

സംഗീതജ്ഞനായ കരമന കൃഷ്ണൻ നായരുടെയും സംഗീതാധ്യാപികയായ ശാന്തകുമാരിയുടെയും മകളായി ജനിച്ച ചിത്ര ബാല്യകാലം മുതൽ സംഗീതവുമായി അടുത്ത ബന്ധം പുലർത്തി. സംഗീതസംവിധായകൻ എം. ജി. രാധാകൃഷ്ണൻ ഒരുക്കിയ ‘രജനി പറയൂ’ എന്ന ഗാനത്തിലൂടെയാണ് ശ്രദ്ധേയമായ തുടക്കം കുറിച്ചത്. തുടർന്ന് നിരവധി ഹിറ്റ് ഗാനങ്ങളിലൂടെ ഇന്ത്യൻ സിനിമാ സംഗീതത്തിലെ അവിഭാജ്യ സാന്നിധ്യമായി മാറുകയായിരുന്നു.

സംഗീതരംഗത്തെ മികവിനുള്ള അംഗീകാരമായി ആറ് ദേശീയ പുരസ്കാരങ്ങളും, വിവിധ സംസ്ഥാനങ്ങളിലെ 16 സംസ്ഥാന ചലച്ചിത്ര പുരസ്കാരങ്ങളും കെ എസ് ചിത്ര സ്വന്തമാക്കിയിട്ടുണ്ട്. കൂടാതെ രാജ്യത്തിന്റെ ഉയർന്ന സിവിലിയൻ ബഹുമതികളായ പത്മശ്രീ, പത്മഭൂഷൺ എന്നിവയും നൽകി രാജ്യം ആദരിച്ചിട്ടുണ്ട്.

നാലു പതിറ്റാണ്ടിലേറെ നീളുന്ന സംഗീതജീവിതത്തിലുടനീളം അനേകം അമരഗാനങ്ങൾ സമ്മാനിച്ച കെ എസ് ചിത്രയ്ക്ക് ജന്മദിനാശംസകളുമായി സംഗീതലോകവും ആരാധകരും സാമൂഹികമാധ്യമങ്ങളിൽ നിറയുകയാണ്.