ബിഹാറിലെ തിരിച്ചടികൾക്കിടെ രാജസ്ഥാനിലെ ആന്റ് നിയോജകമണ്ഡലത്തിൽ നടന്ന ഉപതിരഞ്ഞെടുപ്പ് കോൺഗ്രസിന് ആശ്വാസകരമായി. വോട്ടെണ്ണലിന്റെ 11 റൗണ്ട് പൂർത്തിയായപ്പോൾ കോൺഗ്രസ് സ്ഥാനാർത്ഥി പ്രമോദ് ജെയിന് 7,000-ത്തിലധികം വോട്ടിൽ ലീഡ്. ശ്രദ്ധേയമായി, ഇവിടെ ബിജെപി മൂന്നാം സ്ഥാനത്താണ്. ബിജെപി സ്ഥാനാർത്ഥി മോർപാൽ സുമനെ മറികടന്ന് സ്വതന്ത്ര സ്ഥാനാർത്ഥി നരേഷ് മീണയാണ് രണ്ടാമതായി തുടരുന്നത്.

ബിജെപി എംഎൽഎക്കെതിരായ കേസിലെ  ശിക്ഷയെ തുടർന്നാണ് ആന്റ് മണ്ഡലത്തിൽ ഉപതിരഞ്ഞെടുപ്പ് നടന്നത്. 2005-ലെ സർപഞ്ച് തിരഞ്ഞെടുപ്പിനിടെ സബ് ഡിവിഷണൽ ഓഫീസറെ തോക്കു ചൂണ്ടി ഭീഷണിപ്പെടുത്തിയെന്ന കേസിൽ കോടതി മൂന്ന് വർഷം തടവ് വിധിച്ചിരുന്നു. സുപ്രീം കോടതി അപ്പീൽ തള്ളിയതോടെ അദ്ദേഹം കീഴടങ്ങി, തുടർന്ന് എംഎൽഎ സ്ഥാനം നഷ്ടപ്പെടുകയും ചെയ്തു.

അതേസമയം, തെലങ്കാനയിലെ ജൂബിലി ഹിൽസ് ഉപതിരഞ്ഞെടുപ്പിലും കോൺഗ്രസ് മുന്നേറ്റത്തിലാണ്. മൂന്നു റൗണ്ട് വോട്ടെണ്ണലിന് ശേഷം കോൺഗ്രസ് സ്ഥാനാർത്ഥി നവീൻ യാദവ് 2,995 വോട്ടുകളുടെ ലീഡിലാണ്.

ബിആർഎസിന്റെ സിറ്റിംഗ് എംഎൽഎ മാഗന്തി ഗോപിനാഥിന്റെ നിര്യാണത്തെ തുടർന്ന് നടന്ന തെരഞ്ഞെടുപ്പിൽ 58 സ്ഥാനാർത്ഥികൾ മത്സരിക്കുന്നു. ഗോപിനാഥിന്റെ ഭാര്യ സുനിതയാണ് ബിആർഎസ് സ്ഥാനാർത്ഥി. 2025-ലെ ജൂബിലി ഹിൽസ് ഉപതിരഞ്ഞെടുപ്പിൽ കോൺഗ്രസ് വിജയം നേടുമെന്ന് എക്സിറ്റ് പോളുകളും സൂചന നൽകിയിരുന്നു.