തിരുവനന്തപുരം: നിയമസഭാ തിരഞ്ഞെടുപ്പ് അടുത്തിരിക്കെ പുതുതലമുറ വോട്ടർമാരെ പോളിംഗ് ബൂത്തിലേക്ക് ആകർഷിക്കാൻ നവീന പ്രചാരണ തന്ത്രവുമായി സംസ്ഥാന തെരഞ്ഞെടുപ്പ് കമ്മിഷൻ. ‘Gen Z വോട്ട് പാട്ട്’ എന്ന പേരിൽ പുറത്തിറക്കിയ റാപ്പ് ഗാനം ഇതിനോടകം സോഷ്യൽ മീഡിയയിൽ വൈറലായി ശ്രദ്ധ നേടുകയാണ്.

‘ഒരു വോട്ട് മതി വിധി മാറ്റി എഴുതാൻ’ എന്ന ശക്തമായ സന്ദേശവുമായി തുടങ്ങുന്ന ഗാനം, യുവജനങ്ങളുടെ ഭാഷയും താളവും ഉപയോഗിച്ച് വോട്ടിന്റെ പ്രാധാന്യം ലളിതമായും പ്രഭാവശാലിയായും അവതരിപ്പിക്കുന്നു. പരമ്പരാഗത ബോധവൽക്കരണ രീതികളിൽ നിന്ന് മാറി, യുവതലമുറയുടെ മനസ്സിലേക്കെത്താൻ ഡിജിറ്റൽ പ്ലാറ്റ്‌ഫോമുകൾ കേന്ദ്രീകരിച്ചാണ് ഈ ക്യാമ്പെയിൻ ഒരുക്കിയിരിക്കുന്നത്.

ഗായിക സയനോര ഫിലിപ്പ്, റാപ്പ് കലാകാരന്മാരായ തിരുമാലി, എസ്ടീ (SDEE) എന്നിവർ ചേർന്നാണ് ഗാനം ആലപിച്ചിരിക്കുന്നത്. ജോർജ് പീറ്ററാണ് സംഗീത സംവിധാനം നിർവഹിച്ചത്. റാപ്പ്, ഹിപ്-ഹോപ്പ് ഘടകങ്ങൾ ഉൾപ്പെടുത്തി യുവജനങ്ങളുടെ ശ്രദ്ധ പിടിച്ചുപറ്റുന്ന രീതിയിലാണ് പാട്ട് ഒരുക്കിയിരിക്കുന്നത്.

വീഡിയോ ഗാനത്തിന് ചലച്ചിത്ര താരങ്ങളായ ടിനി ടോവും കൈലാഷും ചേർന്നാണ് സംവിധാനം നിർവഹിച്ചത്. ഇരുവരും ഗാനത്തിൽ അഭിനയിക്കുകയും ചെയ്തിട്ടുണ്ട്. വിവിധ മേഖലകളിൽ മികവ് തെളിയിച്ച ജെൻ Z പ്രതിനിധികൾ വീഡിയോയിൽ പ്രത്യക്ഷപ്പെടുന്നത് ഗാനത്തിന് കൂടുതൽ ആകർഷകത്വം നൽകുന്നു.

എറണാകുളം കാക്കനാട് ജെയിൻ യൂണിവേഴ്സിറ്റി ക്യാമ്പസിൽ നടന്ന ചടങ്ങിൽ ജില്ലാ കളക്ടർ ജി. പ്രിയങ്കയാണ് ഗാനം ഔദ്യോഗികമായി പുറത്തിറക്കിയത്. വോട്ട് ചെയ്യുക എന്നത് അവകാശം മാത്രമല്ല, സാമൂഹിക ഉത്തരവാദിത്വവുമാണെന്ന് അവർ ഓർമ്മിപ്പിച്ചു. ജനാധിപത്യത്തിന്റെ ശക്തി ഓരോ വോട്ടിലും അടങ്ങിയിരിക്കുന്നുവെന്നും, പുതുതലമുറയുടെ സജീവ പങ്കാളിത്തം തെരഞ്ഞെടുപ്പിന്റെ ഗുണമേന്മ വർധിപ്പിക്കുമെന്നും അവർ പറഞ്ഞു.

ഇൻസ്റ്റഗ്രാം റീലുകളും യൂട്യൂബ് ഷോർട്ട്സും പോലുള്ള പ്ലാറ്റ്‌ഫോമുകളിൽ റാപ്പ് സംഗീതം വലിയ സ്വാധീനം ചെലുത്തുന്ന സാഹചര്യത്തിൽ, അതേ ഭാഷയിൽ സന്ദേശം നൽകുകയാണ് കമ്മിഷന്റെ ലക്ഷ്യം. യുവാക്കളുമായി കൂടുതൽ ബന്ധപ്പെടാൻ, അവരുടെ ഇഷ്ടശൈലിയിലൂടെ സംസാരിക്കുക എന്നതാണ് ഈ പ്രചാരണത്തിന്റെ പ്രത്യേകത.

വരാനിരിക്കുന്ന തിരഞ്ഞെടുപ്പിൽ കന്നിവോട്ടർമാരുടെ പങ്കാളിത്തം വർധിപ്പിക്കാൻ ഈ ക്യാമ്പെയിൻ നിർണായകമാകുമെന്ന് തെരഞ്ഞെടുപ്പ് കമ്മിഷൻ പ്രതീക്ഷിക്കുന്നു.