തമിഴ് സൂപ്പർതാരം വിജയ് പ്രധാന കഥാപാത്രത്തെ അവതരിപ്പിക്കുന്ന അവസാന ചിത്രമായി വിശേഷിപ്പിക്കപ്പെടുന്ന ‘ജനനായകൻ’ ഇന്ന് തിയേറ്ററുകളിലെത്തി. റിലീസിന് മുന്നോടിയായി ചിത്രത്തിന് വൻ വരവേൽപ്പാണ് ആരാധകർ ഒരുക്കിയിരിക്കുന്നത്.

ബാലതാരമായി സിനിമയിൽ അരങ്ങേറ്റം കുറിച്ച വിജയ്, പിന്നീട് തമിഴ് സിനിമയിലെ ഏറ്റവും ജനപ്രിയ താരങ്ങളിൽ ഒരാളായി വളർന്നു. 1992-ൽ പുറത്തിറങ്ങിയ ‘നാളൈയ തീർപ്പ്’ എന്ന ചിത്രത്തിലൂടെയാണ് അദ്ദേഹം നായകനായി അരങ്ങേറ്റം കുറിച്ചത്. തുടക്കകാലത്ത് രൂപത്തിന്റെയും അഭിനയത്തിന്റെയും പേരിൽ വിമർശനങ്ങൾ നേരിട്ടെങ്കിലും, 1996-ൽ പുറത്തിറങ്ങിയ ‘പൂവേ ഉനക്കാക’ അദ്ദേഹത്തിന്റെ കരിയറിലെ നിർണായക വഴിത്തിരിവായി.

തുടർന്ന് ‘തുപ്പാക്കി’, ‘കത്തി’, ‘മെർസൽ’, ‘സർക്കാർ’ തുടങ്ങി നിരവധി വിജയചിത്രങ്ങളിലൂടെ അദ്ദേഹം തമിഴ് സിനിമയിലെ മുൻനിര താരമായി മാറി. ഇന്ത്യൻ സിനിമയിലെ ഏറ്റവും കൂടുതൽ പ്രതിഫലം വാങ്ങുന്ന നടന്മാരിൽ ഒരാളായിരിക്കെയാണ് അഭിനയ ജീവിതം അവസാനിപ്പിച്ച് പൊതുരംഗത്തേക്ക് പൂർണമായും കടക്കുന്നതായി വിജയ് പ്രഖ്യാപിച്ചത്.

2024-ൽ തമിഴക വെട്രി കഴകം (TVK) എന്ന രാഷ്ട്രീയ പാർട്ടി രൂപീകരിച്ച വിജയ്, പിന്നീട് രാഷ്ട്രീയ പ്രവർത്തനങ്ങളിൽ സജീവമായി. 2026-ലെ തമിഴ്നാട് നിയമസഭാ തിരഞ്ഞെടുപ്പിൽ പാർട്ടി മികച്ച പ്രകടനം കാഴ്ചവെച്ചതോടെ സഖ്യകക്ഷികളുടെ പിന്തുണയോടെ വിജയ് തമിഴ്നാട് മുഖ്യമന്ത്രിയായി അധികാരമേറ്റു.

സിനിമാ ജീവിതത്തിന് സമാപനം കുറിക്കുന്ന ചിത്രമെന്ന പ്രത്യേകതയും വിജയിയുടെ രാഷ്ട്രീയ പ്രവേശനത്തിന് ശേഷമുള്ള ആദ്യ റിലീസുമെന്ന നിലയിലും ‘ജനനായകൻ’ പ്രേക്ഷകർക്കിടയിൽ വലിയ ശ്രദ്ധ നേടുകയാണ്.