കൊച്ചി: മലയാള സിനിമാലോകത്തും സോഷ്യൽ മീഡിയയിലും വലിയ ചർച്ചയായി മാറിയിരിക്കുകയാണ് നിവിൻ പോളിയും ബി. ഉണ്ണികൃഷ്ണനും ഒന്നിക്കുന്ന പുതിയ ചിത്രം ‘പ്രതിഛായ’. ചിത്രവുമായി ബന്ധപ്പെട്ട ചില ദൃശ്യങ്ങൾ പുറത്തുവന്നതോടെയാണ് ഇത് മുൻ മുഖ്യമന്ത്രി ഉമ്മൻചാണ്ടിയുടെ ജീവിതകഥയാണോ എന്ന സംശയം ഉയർന്നത്.

സിനിമ ട്രാക്കർമാരും ആരാധകരും പങ്കുവെക്കുന്ന ചില താരതമ്യ ചിത്രങ്ങളാണ് വിവാദങ്ങൾക്ക് ഇടയാക്കിയിരിക്കുന്നത്. നെറ്റിയിൽ മുറിവുമായി നിൽക്കുന്ന ഉമ്മൻചാണ്ടിയുടേയും നടൻ ബാലചന്ദ്രമേനോന്റേയും ചിത്രങ്ങളും, കല്ലറയെ ഓർമ്മിപ്പിക്കുന്ന സെറ്റും ഉൾപ്പെടെയുള്ള ദൃശ്യങ്ങളാണ് സോഷ്യൽ മീഡിയയിൽ വ്യാപകമായി പ്രചരിക്കുന്നത്. ഈ ചിത്രങ്ങൾ കൂട്ടിച്ചേർത്ത് ‘ഡീക്കോഡ്’ ചെയ്യാൻ ശ്രമിക്കുന്ന ആരാധകർ സിനിമയുടെ പ്രമേയം മുൻ മുഖ്യമന്ത്രിയുടെ ജീവിതവുമായി ബന്ധപ്പെട്ടതാകാമെന്ന വിലയിരുത്തലിലാണ്.

എന്നാൽ, ഈ ആരോപണങ്ങൾ തള്ളി സംവിധായകനും തിരക്കഥാകൃത്തുമായ ബി. ഉണ്ണികൃഷ്ണൻ രംഗത്തെത്തി. ‘പ്രതിഛായ’ ഒരു വ്യക്തിയുടെ ജീവിതകഥയല്ലെന്നും, യഥാർത്ഥ സംഭവങ്ങളിൽ നിന്ന് പ്രചോദനം ഉൾക്കൊണ്ട ഒരു സാങ്കൽപ്പിക കഥയാണെന്നും അദ്ദേഹം വ്യക്തമാക്കി.

ചിത്രത്തിൽ നിവിൻ പോളിക്കൊപ്പം ബാലചന്ദ്രമേനോൻ, ഷറഫുദ്ദീൻ, ആൻ അഗസ്റ്റിൻ, ഹരിശ്രീ അശോകൻ, മണിയൻപിള്ള രാജു, സായ് കുമാർ, നീതു കൃഷ്ണ, വിഷ്ണു അഗസ്ത്യ, നിശാന്ത് സാഗർ തുടങ്ങിയ പ്രമുഖ താരങ്ങൾ പ്രധാന വേഷങ്ങളിൽ എത്തുന്നുണ്ട്. വ്യത്യസ്ത തലങ്ങളിലുള്ള കഥാപാത്രങ്ങൾ ഉൾക്കൊള്ളുന്ന ഒരു ശക്തമായ നാടകീയ പ്രമേയമാണ് ചിത്രത്തിനുള്ളതെന്ന് സിനിമാ വൃത്തങ്ങൾ സൂചിപ്പിക്കുന്നു.

ശ്രീഗോകുലം മൂവീസിന്റെ ബാനറിൽ ഗോകുലം ഗോപാലനും ആർഡി ഇലുമിനേഷൻസ് എൽഎൽപിയും ചേർന്നാണ് ചിത്രം നിർമ്മിക്കുന്നത്. ഛായാഗ്രഹണം നിർവഹിക്കുന്നത് ചന്ദ്രു സെൽവരാജ്, സംഗീതം ജസ്റ്റിൻ വർഗീസ്. സാങ്കേതികമായും കഥാപരമായും ശ്രദ്ധേയമായ രീതിയിലാണ് ചിത്രം ഒരുങ്ങുന്നതെന്നാണ് സൂചന.

മാർച്ച് 26ന് ചിത്രം തിയേറ്ററുകളിലെത്തും. വിവാദങ്ങളും ചർച്ചകളും ശക്തമാകുന്ന സാഹചര്യത്തിൽ, ‘പ്രതിഛായ’ പ്രേക്ഷകരുടെ പ്രതീക്ഷകൾ ഉയർത്തിയിരിക്കുകയാണ്. സിനിമയുടെ യഥാർത്ഥ പ്രമേയം എന്താണെന്ന് അറിയാൻ റിലീസിനായി കാത്തിരിക്കുകയാണ് ആരാധകർ.