ഹൈദരാബാദ്: തെലുങ്ക് സൂപ്പർതാരം രാം ചരൺ നായകനായി എത്തിയ പാൻ ഇന്ത്യൻ ചിത്രം ‘പെദ്ധി’ ബോക്സ് ഓഫീസിൽ വൻ വിജയത്തിലേക്ക്. റിലീസ് ചെയ്ത് രണ്ട് ദിവസം പിന്നിടുമ്പോൾ ചിത്രം ആഗോളതലത്തിൽ 181.80 കോടി രൂപയുടെ ഗ്രോസ് കളക്ഷൻ നേടിയതായി നിർമ്മാതാക്കൾ അറിയിച്ചു.

ജൂൺ 4ന് ലോകമെമ്പാടുമായി റിലീസ് ചെയ്ത ചിത്രം ആദ്യ ദിനത്തിൽ തന്നെ 135.36 കോടി രൂപയുടെ ഗ്രോസ് കളക്ഷൻ സ്വന്തമാക്കിയിരുന്നു. രണ്ടാം ദിനത്തിൽ 46 കോടിയിലധികം രൂപയാണ് ചിത്രം നേടിയത്. രാം ചരണിന്റെ കരിയറിലെ ഏറ്റവും വലിയ ഓപ്പണിംഗുകളിൽ ഒന്നായാണ് ഈ നേട്ടം വിലയിരുത്തപ്പെടുന്നത്.

ദേശീയ അവാർഡ് ജേതാവായ സംവിധായകൻ ബുചി ബാബു സന സംവിധാനം ചെയ്ത ചിത്രം വൃദ്ധി സിനിമാസിന്റെ ബാനറിൽ വെങ്കട സതീഷ് കിലാരുവാണ് നിർമ്മിച്ചിരിക്കുന്നത്. മൈത്രി മൂവി മേക്കേഴ്‌സും സുകുമാർ റൈറ്റിങ്സും ചേർന്നാണ് ചിത്രം അവതരിപ്പിച്ചിരിക്കുന്നത്.

ഇന്ത്യയിലും വിദേശ വിപണികളിലും മികച്ച പ്രതികരണമാണ് ചിത്രത്തിന് ലഭിക്കുന്നത്. ആദ്യ വാരാന്ത്യത്തിനുള്ളിൽ തന്നെ 250 കോടി രൂപയുടെ ആഗോള കളക്ഷൻ ചിത്രം മറികടക്കുമെന്നാണ് ട്രേഡ് അനലിസ്റ്റുകളുടെ വിലയിരുത്തൽ.

ചിത്രത്തിലെ ടൈറ്റിൽ കഥാപാത്രമായ ‘പെദ്ധി’യായി രാം ചരൺ നടത്തിയ പ്രകടനം പ്രേക്ഷകരുടെയും നിരൂപകരുടെയും പ്രശംസ നേടുകയാണ്. ചിത്രത്തിനായി താരം നടത്തിയ ശാരീരിക പരിവർത്തനവും ശ്രദ്ധേയമാണ്. എ.ആർ. റഹ്മാൻ ഒരുക്കിയ പശ്ചാത്തല സംഗീതവും ഗാനങ്ങളും ചിത്രത്തിന്റെ പ്രധാന ആകർഷണങ്ങളിലൊന്നാണ്.

കന്നഡ സൂപ്പർതാരം ശിവരാജ് കുമാർ, ബോളിവുഡ് താരം ജാൻവി കപൂർ, ദിവ്യേന്ദു ശർമ, ജഗപതി ബാബു, ബോമൻ ഇറാനി എന്നിവരും ചിത്രത്തിലെ പ്രധാന കഥാപാത്രങ്ങളെ അവതരിപ്പിക്കുന്നു.

ആക്ഷൻ, ഡ്രാമ, പ്രണയം, വികാരനിർഭരമായ മുഹൂർത്തങ്ങൾ എന്നിവയ്ക്കൊപ്പം ക്രിക്കറ്റ്, ഗുസ്തി, ഓട്ടം തുടങ്ങിയ കായിക ഘടകങ്ങളും ചിത്രത്തിൽ പ്രധാന പങ്കുവഹിക്കുന്നു. തെലുങ്ക്, തമിഴ്, മലയാളം, കന്നഡ, ഹിന്ദി ഭാഷകളിലായി പാൻ ഇന്ത്യൻ റിലീസായാണ് ചിത്രം പ്രദർശനത്തിനെത്തിയത്.