കൊച്ചി: വിഷ്ണു വിശാലും ഐശ്വര്യ ലക്ഷ്മിയും വീണ്ടും ഒന്നിക്കുന്ന ‘ഗാട്ട കുസ്തി 2’ എന്ന സ്പോർട്സ് ഡ്രാമയുടെ ട്രെയ്‌ലർ പുറത്തിറങ്ങി. ചിത്രത്തിന്റെ ഓഡിയോ ലോഞ്ചിനോടനുബന്ധിച്ചാണ് ട്രെയ്‌ലർ പ്രേക്ഷകർക്കായി റിലീസ് ചെയ്തത്. ജൂലൈ 3-ന് ചിത്രം ലോകമെമ്പാടുമുള്ള തിയേറ്ററുകളിൽ പ്രദർശനത്തിനെത്തും.

സംവിധായകൻ ചെല്ല അയ്യാവു ഒരുക്കുന്ന ചിത്രം വമ്പൻ വിജയമായ ആദ്യഭാഗത്തിന്റെ തുടർച്ചയായാണ് എത്തുന്നത്. മുൻ ചിത്രത്തിലെ പ്രധാന കഥാപാത്രങ്ങളായ വീരയുടെയും കീർത്തിയുടെയും ജീവിതത്തിലേക്ക് പുതിയ സംഭവവികാസങ്ങൾ കടന്നുവരുന്നതാണ് രണ്ടാം ഭാഗത്തിന്റെ പ്രമേയം. ഇത്തവണ ഇവരുടെ മകളെ കേന്ദ്രീകരിച്ചുള്ള കഥയും ചിത്രത്തിൽ പ്രധാന ഘടകമാകുന്നുവെന്ന് ട്രെയ്‌ലർ സൂചിപ്പിക്കുന്നു.

സ്പോർട്സ്, ആക്ഷൻ, കുടുംബബന്ധങ്ങൾ, ഹാസ്യം, വൈകാരിക നിമിഷങ്ങൾ എന്നിവ സമന്വയിപ്പിച്ചാണ് സിനിമയുടെ അവതരണം. ആദ്യ ഭാഗത്തിന്റെ വിജയത്തെ തുടർന്ന് രണ്ടാം ഭാഗത്തിനും പ്രേക്ഷകരിൽ വലിയ പ്രതീക്ഷയാണ് ഉയർന്നിരിക്കുന്നത്.

വേൽസ് ഫിലിം ഇന്റർനാഷണലും വിഷ്ണു വിശാൽ സ്റ്റുഡിയോസും ചേർന്നാണ് ചിത്രം നിർമ്മിക്കുന്നത്. കേരളത്തിൽ ചിത്രം തിയേറ്ററുകളിലെത്തിക്കുന്നത് E4 എന്റർടെയിൻമെന്റ് ആണ്.