മലയാള സിനിമാപ്രേക്ഷകർ ആകാംക്ഷയോടെ കാത്തിരിക്കുന്ന മാസ് ആക്ഷൻ ചിത്രങ്ങളിലൊന്നായ ‘വരവ്’ ജൂൺ 12ന് തിയേറ്ററുകളിലെത്തും. നടൻ ജോജു ജോർജിനെ കേന്ദ്രകഥാപാത്രമാക്കി ഒരുക്കുന്ന ചിത്രത്തിന് ഇതിനോടകം തന്നെ വലിയ ഹൈപ്പാണ് ലഭിച്ചിരിക്കുന്നത്. പുറത്തിറങ്ങിയ ടീസറും ട്രെയിലറും സോഷ്യൽ മീഡിയയിൽ ശ്രദ്ധനേടിയതോടെ ചിത്രത്തിലെ ‘പോൾസൺ’ എന്ന കഥാപാത്രത്തിന്റെ വരവിനായുള്ള കാത്തിരിപ്പും ശക്തമായിരിക്കുകയാണ്.

കിടിലൻ ഡയലോഗുകളും ത്രസിപ്പിക്കുന്ന ആക്ഷൻ രംഗങ്ങളും ശക്തമായ പശ്ചാത്തല സംഗീതവും ചേർന്ന ട്രെയിലർ സിനിമയ്ക്ക് വലിയ പ്രതീക്ഷയാണ് സമ്മാനിച്ചത്. ജോജു ജോർജിന്റെ കരിയറിലെ മറ്റൊരു ശക്തമായ കഥാപാത്രമായി പോൾസൺ മാറുമെന്ന വിലയിരുത്തലും സിനിമാലോകത്ത് ഉയരുന്നുണ്ട്.

ആദ്യമായി ജോജു ജോർജ്–ഷാജി കൈലാസ് കൂട്ടുകെട്ട്

ആക്ഷൻ സിനിമകളുടെ രാജാവായി വിശേഷിപ്പിക്കപ്പെടുന്ന ഷാജി കൈലാസും, പ്രകടന മികവിലൂടെ മലയാള സിനിമയിൽ തന്റേതായ സ്ഥാനം ഉറപ്പിച്ച ജോജു ജോർജും ആദ്യമായി ഒന്നിക്കുന്ന ചിത്രം എന്ന പ്രത്യേകതയും ‘വരവ്’ക്ക് ഉണ്ട്. ഈ കോമ്പിനേഷൻ തന്നെയാണ് ചിത്രത്തെ റിലീസിന് മുമ്പ് തന്നെ ശ്രദ്ധാകേന്ദ്രമാക്കുന്നത്.

98 ദിവസങ്ങളിലായി ബിഗ് ബഡ്ജറ്റിൽ ചിത്രീകരണം പൂർത്തിയാക്കിയ ചിത്രം ഹൈറേഞ്ച് പശ്ചാത്തലത്തിലാണ് കഥ പറയുന്നത്. പ്ലാന്റർമാർക്കിടയിലെ അധികാര പോരാട്ടവും കുടിപ്പകയും അതിജീവനവുമാണ് ചിത്രത്തിന്റെ പ്രധാന പ്രമേയം. കുടുംബബന്ധങ്ങളെയും വികാരങ്ങളെയും സ്പർശിക്കുന്ന മുഹൂർത്തങ്ങൾക്കൊപ്പം പക്കാ മാസ് എന്റർടെയ്ൻമെന്റായും ചിത്രം എത്തുമെന്നാണ് റിപ്പോർട്ടുകൾ.

എ.കെ. സാജന്റെ തിരക്കഥ

ഷാജി കൈലാസിന്റെ ഹിറ്റ് ചിത്രങ്ങളായ ‘ചിന്താമണി കൊലക്കേസ്’, ‘റെഡ് ചില്ലീസ്’ എന്നിവയ്ക്ക് തിരക്കഥയൊരുക്കിയ എ.കെ. സാജൻ തന്നെയാണ് ‘വരവ്’ക്കും കഥയും തിരക്കഥയും ഒരുക്കുന്നത്. ശക്തമായ കഥാസന്ദർഭങ്ങളും ഓർമ്മയിൽ നിൽക്കുന്ന ഡയലോഗുകളും ചിത്രത്തിന്റെ പ്രധാന കരുത്താകുമെന്നാണ് അണിയറ പ്രവർത്തകർ പറയുന്നത്.

ഓൾഗാ പ്രൊഡക്ഷൻസിന്റെ ബാനറിൽ നൈസി റെജി നിർമ്മിക്കുന്ന ചിത്രത്തിന് എക്സിക്യൂട്ടീവ് പ്രൊഡ്യൂസർമാരായി ജോമി ജോസഫ് പുളിങ്കുന്ന്, രാഹുൽ റെജി എന്നിവർ പ്രവർത്തിക്കുന്നു.

വമ്പൻ താരനിര

ജോജു ജോർജിനൊപ്പം വലിയ താരനിരയാണ് ചിത്രത്തിൽ അണിനിരക്കുന്നത്. വാണി വിശ്വനാഥ്, സുകന്യ, മുരളി ഗോപി, അർജുൻ അശോകൻ, ദീപക് പറമ്പോൽ, ബാബുരാജ്, അസീസ് നെടുമങ്ങാട്, ബൈജു സന്തോഷ്, അഭിമന്യു തിലകൻ, ശ്രീജിത്ത് രവി, കോട്ടയം രമേശ്, ബിജു പപ്പൻ, ചാലി പാല, സാനിയ അയ്യപ്പൻ, വിൻസി അലോഷ്യസ്, വീണ നായർ എന്നിവരടക്കം ശ്രദ്ധേയമായ താരസാന്നിധ്യമാണ് ചിത്രത്തിന്റെ മറ്റൊരു ആകർഷണം.

ആക്ഷനൊപ്പം കുടുംബ വികാരങ്ങളും

പേരിൽ തന്നെ മാസ് ഫീൽ ഉണ്ടെങ്കിലും ‘വരവ്’ ഒരു പക്കാ ആക്ഷൻ ത്രില്ലർ മാത്രമല്ല, കുടുംബപ്രേക്ഷകരെയും ചേർത്തുപിടിക്കുന്ന വികാരനിർഭരമായ കഥ കൂടിയാണെന്ന് അണിയറ പ്രവർത്തകർ വ്യക്തമാക്കുന്നു. അതിനാൽ തന്നെ യുവാക്കളെയും കുടുംബപ്രേക്ഷകരെയും ഒരുപോലെ ആകർഷിക്കുന്ന ചിത്രമായി ‘വരവ്’ മാറുമെന്ന പ്രതീക്ഷയിലാണ് സിനിമാപ്രേമികൾ.

എസ്. ശരവണൻ ഛായാഗ്രഹണം നിർവഹിക്കുന്ന ചിത്രത്തിന് സാം സി.എസ് സംഗീതം പകരുന്നു. എഡിറ്റിംഗ് ഷമീർ മുഹമ്മദ്, കലാസംവിധാനം സാബു റാം എന്നിവരാണ് കൈകാര്യം ചെയ്യുന്നത്. സാങ്കേതിക മികവും വമ്പൻ സ്കെയിലും ചേർന്ന് ‘വരവ്’ ഈ വർഷത്തെ ശ്രദ്ധേയ റിലീസുകളിലൊന്നാകുമെന്ന വിലയിരുത്തലാണ് ഉയരുന്നത്.

ജൂൺ 12ന് തിയേറ്ററുകളിലെത്തുന്ന ‘വരവ്’, മലയാള സിനിമയ്ക്ക് മറ്റൊരു വലിയ മാസ് ഹിറ്റാകുമോ എന്ന ആകാംക്ഷയിലാണ് ആരാധകർ.