രാജ്യത്തെ മെഡിക്കൽ പ്രവേശന പരീക്ഷയായ നീറ്റ് യുജി 2026 സംബന്ധിച്ച് നിർണായക പ്രഖ്യാപനവുമായി നാഷണൽ ടെസ്റ്റിംഗ് ഏജൻസി (NTA). മെയ് 3ന് നടന്ന നീറ്റ് യുജി പരീക്ഷ റദ്ദാക്കിയതായി എൻടിഎ ഔദ്യോഗികമായി അറിയിച്ചു. പരീക്ഷയുമായി ബന്ധപ്പെട്ട ചോദ്യപേപ്പർ ചോർച്ചയും ക്രമക്കേടുകളും സംബന്ധിച്ച ഗുരുതര ആരോപണങ്ങൾ ഉയർന്ന പശ്ചാത്തലത്തിലാണ് പരീക്ഷ വീണ്ടും നടത്താൻ തീരുമാനം എടുത്തിരിക്കുന്നത്.

പുതിയ പരീക്ഷ തീയതി പിന്നീട് പ്രഖ്യാപിക്കുമെന്ന് എൻടിഎ വ്യക്തമാക്കി. വിദ്യാർത്ഥികൾക്ക് പുതിയതായി രജിസ്റ്റർ ചെയ്യേണ്ടതില്ലെന്നും അധിക പരീക്ഷാഫീസ് ഈടാക്കില്ലെന്നും അധികൃതർ അറിയിച്ചു. പരീക്ഷ സംബന്ധിച്ച എല്ലാ വിവരങ്ങൾക്കും വിദ്യാർത്ഥികളും രക്ഷിതാക്കളും ഔദ്യോഗിക വെബ്സൈറ്റുകളും ഔദ്യോഗിക അറിയിപ്പുകളും മാത്രം ആശ്രയിക്കണമെന്ന് നിർദേശം നൽകിയിട്ടുണ്ട്.

120 ചോദ്യങ്ങൾ ചോർന്നതായി കണ്ടെത്തൽ

പരീക്ഷയ്ക്ക് മുമ്പ് സോഷ്യൽ മീഡിയയിലൂടെയും ചില ടെലഗ്രാം ഗ്രൂപ്പുകളിലൂടെയും പ്രചരിച്ച ഗസ് പേപ്പറിലെ 120 ചോദ്യങ്ങൾ യഥാർത്ഥ പരീക്ഷയിൽ വന്നതായി അന്വേഷണത്തിൽ കണ്ടെത്തിയതോടെയാണ് വിഷയം ഗുരുതരമായത്. ഇതോടെ പരീക്ഷയുടെ വിശ്വാസ്യതയെക്കുറിച്ച് രാജ്യത്തുടനീളം പ്രതിഷേധവും ആശങ്കയും ശക്തമായി.

സംഭവത്തെ തുടർന്ന് പരീക്ഷാ ക്രമക്കേട് സംബന്ധിച്ച അന്വേഷണം സിബിഐയ്ക്ക് കൈമാറാൻ കേന്ദ്രസർക്കാർ തീരുമാനിച്ചു. രാജ്യവ്യാപകമായി പരീക്ഷാ മാഫിയ പ്രവർത്തിച്ചതായും ചില കോച്ചിംഗ് നെറ്റ്വർക്കുകളുടെ പങ്കും അന്വേഷിക്കുന്നതായും റിപ്പോർട്ടുകളുണ്ട്.

സുരക്ഷാ മാനദണ്ഡങ്ങൾ പാലിച്ചിരുന്നുവെന്ന് എൻടിഎ

മെയ് 3ന് നടന്ന പരീക്ഷ എല്ലാ സുരക്ഷാ സംവിധാനങ്ങളും പാലിച്ചാണ് നടത്തിയതെന്ന് എൻടിഎ അറിയിച്ചു. ജിപിഎസ് ഘടിപ്പിച്ച വാഹനങ്ങളിലൂടെയാണ് ചോദ്യപേപ്പറുകൾ പരീക്ഷാ കേന്ദ്രങ്ങളിലെത്തിച്ചതെന്നും, എല്ലാ കേന്ദ്രങ്ങളിലും സിസിടിവി നിരീക്ഷണവും ബയോമെട്രിക് പരിശോധനയും ഉണ്ടായിരുന്നുവെന്നും അധികൃതർ വ്യക്തമാക്കി.

എന്നാൽ മെയ് 7ന് വൈകുന്നേരത്തോടെയാണ് ക്രമക്കേട് സംബന്ധിച്ച നിർണായക വിവരങ്ങൾ എൻടിഎയ്ക്ക് ലഭിച്ചതെന്ന് അറിയിച്ചിട്ടുണ്ട്. തുടർന്ന് മെയ് 8ന് കേന്ദ്ര അന്വേഷണ ഏജൻസികൾക്ക് വിവരം കൈമാറുകയും വിശദമായ അന്വേഷണം ആരംഭിക്കുകയും ചെയ്തു.

വിദ്യാർത്ഥികളിൽ ആശങ്ക

പരീക്ഷ റദ്ദാക്കിയ വാർത്ത ലക്ഷക്കണക്കിന് വിദ്യാർത്ഥികളെയും രക്ഷിതാക്കളെയും ആശങ്കയിലാഴ്ത്തിയിരിക്കുകയാണ്. മാസങ്ങളോളം തയ്യാറെടുത്ത ശേഷം പരീക്ഷ എഴുതിയ വിദ്യാർത്ഥികൾക്ക് വീണ്ടും പരീക്ഷ നേരിടേണ്ടി വരുന്നത് വലിയ മാനസിക സമ്മർദ്ദമുണ്ടാക്കുമെന്ന ആശങ്ക വിദ്യാഭ്യാസ രംഗത്ത് ഉയരുന്നുണ്ട്.

അതേസമയം, പരീക്ഷയുടെ വിശ്വാസ്യത സംരക്ഷിക്കാനാണ് ഈ നടപടിയെന്ന് എൻടിഎ വിശദീകരിച്ചു. അന്വേഷണ ഏജൻസികൾക്ക് പൂർണ്ണ പിന്തുണ നൽകുമെന്നും, കുറ്റക്കാർക്കെതിരെ ശക്തമായ നടപടി സ്വീകരിക്കുമെന്നും അധികൃതർ അറിയിച്ചു.

പുതിയ തീയതി കാത്ത് വിദ്യാർത്ഥികൾ

പുതിയ പരീക്ഷ തീയതി ഉടൻ പ്രഖ്യാപിക്കുമെന്നാണ് സൂചന. അതുവരെ വിദ്യാർത്ഥികൾ പഠനം തുടരുകയും അഭ്യൂഹങ്ങളിൽ വിശ്വസിക്കാതിരിക്കുകയും ചെയ്യണമെന്ന് വിദ്യാഭ്യാസ വിദഗ്ധരും നിർദേശിക്കുന്നു.

രാജ്യത്തെ ഏറ്റവും വലിയ മത്സരപരീക്ഷകളിലൊന്നായ നീറ്റിനെ ചുറ്റിപ്പറ്റിയ വിവാദം വിദ്യാഭ്യാസ രംഗത്ത് വലിയ ചർച്ചകൾക്കും പരീക്ഷാ സംവിധാനത്തിന്റെ വിശ്വാസ്യതയെക്കുറിച്ചുള്ള ചോദ്യങ്ങൾക്കും വഴിവെച്ചിരിക്കുകയാണ്.