കരാക്കസ്: ലാറ്റിനമേരിക്കൻ രാജ്യമായ വെനസ്വേലയിൽ ഉണ്ടായ ശക്തമായ ഭൂചലനത്തെ തുടർന്ന് വ്യാപക നാശനഷ്ടം റിപ്പോർട്ട് ചെയ്യപ്പെടുന്നു. വിവിധ അന്താരാഷ്ട്ര മാധ്യമ റിപ്പോർട്ടുകൾ പ്രകാരം നിരവധി പേർ മരിച്ചതായും ആയിരത്തിലധികം പേർക്ക് പരിക്കേറ്റതായും അറിയുന്നു. കെട്ടിടാവശിഷ്ടങ്ങൾക്കിടയിൽ കുടുങ്ങിയവരെ രക്ഷപ്പെടുത്താനുള്ള ദൗത്യം വിവിധ ഏജൻസികളുടെ നേതൃത്വത്തിൽ തുടരുകയാണ്.

തുറമുഖ നഗരമായ ലാ ഗ്വൈറ  മേഖലയിലാണ് ഏറ്റവും കൂടുതൽ നാശനഷ്ടം റിപ്പോർട്ട് ചെയ്തിരിക്കുന്നത്. നിരവധി കെട്ടിടങ്ങൾ തകർന്നതായും നിരവധി പേരെ കാണാതായതായും അധികൃതർ അറിയിച്ചു. അതിനാൽ മരണസംഖ്യ ഇനിയും ഉയരാൻ സാധ്യതയുണ്ടെന്നാണ് വിലയിരുത്തൽ.

പ്രാദേശിക സമയം വൈകുന്നേരമാണ് ശക്തമായ ഭൂചലനങ്ങൾ അനുഭവപ്പെട്ടത്. ആദ്യ ഭൂചലനത്തിന് പിന്നാലെ വീണ്ടും ശക്തമായ കുലുക്കമുണ്ടായതായി ഭൂകമ്പ നിരീക്ഷണ ഏജൻസികൾ അറിയിച്ചു. ഇതിനെ തുടർന്ന് സിമോൺ ബൊളിവർ അന്താരാഷ്ട്ര വിമാനത്താവളത്തിന്റെ പ്രവർത്തനങ്ങൾ താൽക്കാലികമായി നിർത്തിവച്ചു. ആദ്യം സുനാമി മുന്നറിയിപ്പ് നൽകിയിരുന്നെങ്കിലും പിന്നീട് അത് പിൻവലിച്ചു.

സ്ഥിതിഗതികൾ വിലയിരുത്തിയ വെനസ്വേലൻ ഭരണകൂടം അടിയന്തര നടപടികൾ ആരംഭിച്ചിട്ടുണ്ട്. അമേരിക്ക, മെക്സിക്കോ, എൽ സാൽവദോർ ഉൾപ്പെടെയുള്ള രാജ്യങ്ങൾ രക്ഷാപ്രവർത്തനങ്ങൾക്ക് സഹായം വാഗ്ദാനം ചെയ്തതായി റിപ്പോർട്ടുകളുണ്ട്.