ന്യൂഡൽഹി: നീറ്റ് യു.ജി പുനഃപരീക്ഷയെ ചുറ്റിപ്പറ്റി തെറ്റായ വിവരങ്ങളും ചോർന്ന ചോദ്യപേപ്പർ എന്ന പേരിലുള്ള ഉള്ളടക്കങ്ങളും പ്രചരിപ്പിച്ചതിനെ തുടർന്ന് 50-ലധികം ടെലഗ്രാം ചാനലുകൾ അധികൃതർ ബ്ലോക്ക് ചെയ്തു. സംഭവവുമായി ബന്ധപ്പെട്ട് പൊലീസ്, സൈബർ ക്രൈം വിഭാഗങ്ങൾ എന്നിവർക്കും പരാതി നൽകിയിട്ടുണ്ട്.

ചോദ്യപേപ്പർ ചോർച്ച ആരോപണത്തെ തുടർന്ന് റദ്ദാക്കിയ നീറ്റ് യു.ജി പരീക്ഷയുടെ പുനഃപരീക്ഷ ജൂൺ 21-നാണ് നടക്കുന്നത്. പരീക്ഷയുടെ വിശ്വാസ്യതയും സുതാര്യതയും ഉറപ്പാക്കുന്നതിനായി കേന്ദ്ര സർക്കാർ കർശന സുരക്ഷാ ക്രമീകരണങ്ങളാണ് ഒരുക്കിയിരിക്കുന്നത്.

കാബിനറ്റ് സെക്രട്ടറി ടി.വി. സോമനാഥന്റെ അധ്യക്ഷതയിൽ ചേർന്ന ഉന്നതതല യോഗത്തിൽ പരീക്ഷാ സുരക്ഷയും ഏകോപന നടപടികളും വിശദമായി വിലയിരുത്തി. നാഷണൽ ടെസ്റ്റിംഗ് ഏജൻസി (NTA) ഡയറക്ടർ ജനറൽ അഭിഷേക് സിങ്ങും യോഗത്തിൽ പങ്കെടുത്തു.

പരീക്ഷാ നടത്തിപ്പുമായി ബന്ധപ്പെട്ട എല്ലാ ഏജൻസികളും കൃത്യമായ സഹകരണത്തോടെ പ്രവർത്തിക്കണമെന്ന് യോഗത്തിൽ നിർദേശിച്ചു. പരീക്ഷയെ അട്ടിമറിക്കാനോ ക്രമക്കേടുകൾ സൃഷ്ടിക്കാനോ ശ്രമിക്കുന്നവർക്കെതിരെ ശക്തമായ നിയമനടപടികൾ സ്വീകരിക്കുമെന്ന് കേന്ദ്ര സർക്കാർ മുന്നറിയിപ്പ് നൽകി.

കേന്ദ്ര-സംസ്ഥാന സർക്കാരുകൾ, ജില്ലാ ഭരണകൂടങ്ങൾ, നിയമസംരക്ഷണ ഏജൻസികൾ എന്നിവയുടെ സംയുക്ത മേൽനോട്ടത്തിലാണ് പുനഃപരീക്ഷ നടത്തുന്നത്. വിദ്യാർത്ഥികൾക്ക് സുരക്ഷിതവും സുതാര്യവുമായ പരീക്ഷാ അന്തരീക്ഷം ഉറപ്പാക്കുകയാണ് ലക്ഷ്യമെന്ന് അധികൃതർ വ്യക്തമാക്കി.