സ്പെയിൻ: ഫുട്ബോൾ ലോകത്തെ അമ്പരപ്പിച്ച് അർജന്റീനൻ സൂപ്പർ താരം ലയണൽ മെസി സ്പെയിനിലെ ഒരു ക്ലബ് സ്വന്തമാക്കി. സ്പെയിനിലെ നിയ പ്രവിശ്യയിൽ ആസ്ഥാനമായ അഞ്ചാം ഡിവിഷൻ ക്ലബ്ബായ യൂണിയോ എസ്‌പോർട്ടിവോ കോർണെല്ല (യുഇ കോർണെല്ല) യുടെ മുഴുവൻ ഓഹരികളും സ്വന്തമാക്കിയിരിക്കുകയാണ് മെസി. ക്ലബ്ബിന്റെ 100 ശതമാനം ഉടമസ്ഥാവകാശം സ്വന്തമാക്കിയെന്നതാണ് റിപ്പോർട്ടുകൾ.

മെസി വളർന്നു വളർന്ന ക്ലബ്ബായ ബാഴ്‌സലോണയ്ക്ക് സമീപത്തുള്ള ഈ ക്ലബ്ബിനെ സ്വന്തമാക്കിയത് ഏറെ പ്രതീകാത്മക നീക്കമാണെന്നാണ് കായികലോകത്തിന്റെ വിലയിരുത്തൽ. ക്ലബ് ഏറ്റെടുക്കാൻ മെസി ചെലവഴിച്ച തുക ഔദ്യോഗികമായി പുറത്തുവിട്ടിട്ടില്ലെങ്കിലും, വൻ നിക്ഷേപമാണ് ഇതിന് പിന്നിലെന്നാണ് അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നത്.

1951-ൽ സ്ഥാപിതമായ കോർണെല്ല ക്ലബ് സ്പാനിഷ് ഫുട്ബോൾ സംവിധാനത്തിൽ ശ്രദ്ധേയമായ ചരിത്രമുള്ളതാണ്. 2013-14 സീസണിൽ അഞ്ചാം ഡിവിഷനിൽ ചാമ്പ്യന്മാരായി മാറിയ ഈ ക്ലബ് നിലവിൽ പോയിന്റ് പട്ടികയിൽ മൂന്നാം സ്ഥാനത്താണ്. ഏകദേശം 3,700 പേർക്ക് ഇരിക്കാവുന്ന സ്വന്തം ഹോം ഗ്രൗണ്ടും ക്ലബ്ബിനുണ്ട്. എന്നാൽ അടിസ്ഥാന സൗകര്യങ്ങളിലും പരിശീലന സംവിധാനങ്ങളിലും കൂടുതൽ വികസനം ആവശ്യമാണെന്ന് വിലയിരുത്തപ്പെടുന്നു.

മെസി ക്ലബ്ബിന്റെ ഉടമസ്ഥത ഏറ്റെടുത്തതോടെ പരിശീലന സൗകര്യങ്ങൾ, യുവതാര വികസന അക്കാദമി, ഇൻഫ്രാസ്ട്രക്ചർ എന്നിവയിൽ വലിയ മാറ്റങ്ങൾ പ്രതീക്ഷിക്കപ്പെടുന്നു. യുവതാരങ്ങളെ വളർത്തിയെടുക്കുന്നതിനും ക്ലബ്ബിനെ ഉയർന്ന ലീഗുകളിലേക്ക് എത്തിക്കുന്നതിനും ഈ നീക്കം സഹായകമാകുമെന്നാണ് വിലയിരുത്തൽ.

ഫുട്ബോൾ കരിയറിനൊപ്പം തന്നെ ക്ലബ് മാനേജ്മെന്റ് മേഖലയിലേക്ക് കടക്കാനുള്ള മെസിയുടെ താൽപ്പര്യത്തിന്റെ സൂചനയാണിത്. ഭാവിയിൽ കൂടുതൽ ക്ലബ്ബുകളിലേക്ക് നിക്ഷേപം നടത്താനും സാധ്യതയുണ്ടെന്നാണ് റിപ്പോർട്ടുകൾ. ലോക ഫുട്ബോളിൽ മുൻനിര താരങ്ങൾ ക്ലബ്ബുകളുടെ ഉടമസ്ഥത ഏറ്റെടുക്കുന്ന പ്രവണത ശക്തമാകുന്നതിനിടെയാണ് മെസിയുടെ ഈ നീക്കം ശ്രദ്ധേയമാകുന്നത്.